ليــــــــل و كَمـــــــره

[طيف الدليمي]

ليــل و كَمــره

مرّن اسنينك عجاف ... اتصورت بيهن اشوفك
خبزه ترفه .. وتشبع ابطون اليتامى
وترجع البسمه الثغرهم
مرّن اسنينك ... عجاف
وليلك الما نام لجلك ينتظر .. سطعة الكَمره
وحته شمسك .. انزعت ثوب العرس .. لبست سواد
ويومك الما شاف فجـره
كَبل بيك العيد فرحه .. والطفل يحلم يكض عيديه بيده
وهسه عيدك صار حسره
كَبل .. نارك لو حمت تمطر دفـــو ابلحظة شتاك
وهسه بس تمطر رماد ..
واهفتت جمـره اعلى جمـره
او من كَبل جانون والدتي الحنينه .. يشتهي السيح اعلى ناره
اويشبع من الريحه .. جاري
وياكل من الجوع صبره
او مرّن اسنينك ... عجاف
ابلايه دمعه .. ابلا حزن .. وبلايه موت .. ابلا غصن مكَطوع زهره
يا وطنه .. يا لغــز كلش جبير .. او حله ضايع من ادينه
وصعب كلـش لليفسـره
ويا وطنه .. اشلون افسرك .. وانته ايه اتنزلت من السماء
اتنزلت رادت نبي .. تغفى اعلى صدره
يا سفينة نوح ماخذها الحنين .. وتحتضن طوفان بحــره
او مو عجيبه اسنينك الصارن عجاف .. تنتظر يوسف يجيها
او مو عجيبه ايعود عصـره
او مو عجيبه اتموت ذكره .. ولا عجيبه اتعيش ذكره
وتولـد من الذكره ذكره
جنت للشاعر قوافي .. وجنت للشاعر قصيده .. او قصه حلوه
وقلم بس يبجي اعلى حبــره
وجنت مثل اكَلاده ليـلو .. اندارت ابركَبـة شمس .. يوم العرس
انزفـّت ابصوت المدافع ..
اتبرجت شفتها .. دم .. او غدت حمره
اويا وطنه .. يا وطن اعظم حضاره .. بيك صار الموت رمشه
بيك صار الموت رعشه
بيك صار الموت نظره
او غيرو كل القوانين اعلى كَاعك .. وحمورابي اشكَد تأذى
لأن عدموها الـمسّله ..
واذبحوها ابموس شفـره
واكتبو قانونهم بين الشوارع .. اليكَول انريد حرية ابلادي .. ينذبح
واليكَول انريد نحلم .. ينذبح
واليكَول انريد .. لازم للسياط ايدير ظهره
ويا رصيف الحضن طفله .. اتجدّي ابماعونها .. ورادت حنان
وامها متـوسده اعلى موكَـد
ناره حمره
شرد اكَلك ياوطن .. عن الجروح النامت ابصدر الأرامل
وامهات الفكـَـدن ابمهدك شباب
واخنكـَن باالروح عبره
اويا وطن .. هذا الكَلب مكسور خاطر .. من كثر همـّـه تشظه
او ينتظر منك تجبـره
او ينتظر منك تجبـره

[Miss Alrassam]

اويشبع من الريحه .. جاري
وياكل من الجوع صبره
او مرّن اسنينك ... عجاف

سلمت الانامل عاشت الايادي
دومك مبدع تسلم
تحياتي الك وردة

[مريومه العراقيه]

شكرا للكلمات الحلوه

[طيف الدليمي]

**((&&--- شـكـراً جـزيـلاً عـلـى الـمـرور الـجـمـيـل ---&&))**

**((&&--- گل حبي واحترامي الى من يضف رد لي ---&&))**