دارمــــــــــــ تراثيه ـــــــــــــــــــــيات

ما تنسمع رحّاي بس آيدي أدير
أطحن بكايه الروح موش أطحن اشعير
*****
أطحن واكضي الليل عن المأ ريده
بالكذله أصبح شيب من مدة ايده
*****
موش أطحن شعيرات أطحن بهمك
أكعد ودور الروح تلكاهه يمك
*****
ما تنسمع رحّاي بس بجيّ مسموع
جاتلني والله هواي ما منه مرجوع
*****
متحزمه وانكل شوك (للفود)أدفيه
بغشيش ألك يالموت؟من عندي دخفيه
*****
ضيجة خلك بالبيت رجلي آنه اشوفه
صاحت علىّ الناس جن أرد اعوفه
*****
الودر..؟ جاني ينام والشمس عدله
والله بجلب مجلوب لوصح أبدله
*****
وين اليفك مظلوم وين الله وينه
يتركرك عله جلاي هذا الحضينه
*****
أتكلي أمي اخذيه اكرع وشايب
أتلمس بعلباه مامش كصايب
*****
زفوني نص الليل للبرد حيله...؟
حبني وترسني اتفال من وره الشيله
*****
الحجي بس وياي ناكص بالعيار
كلهن يكسرن جوز وآنه أكسر حجار
*****
كل الشيوب التموت شيبه يتجدد
رآيه وسبع خرفان يومن تمدد
*****
كالولي رجلج مات موتة جلبنه...؟
النخل بيه جريد والصاري عدنه..؟؟؟
*****
أيكلي همي العشه خلينه نشبع نوم
الما تريده النفس جالشركه بالزردوم
*****
يا فلان اجاك وليد حظك غلبني
اوصل لباب الدار يبجي ويردني
*****
يا نغل ولد(أعفين )بالشط من ارميك
لوجنت أبن هواي بالعين أخليك
*****
أرجه اليموت يعود روحي أمهبوله
طبكت عليه الكاع ما بعد أنوله
*****
كلجن يمظلومات للكاظم امشن
ويم سيد السادات فكن حزنجن
*****
شايله فرخ(لكعيم ) مالج يابطني
ربطة شفج بعذار ربي ربطني..؟
*****
آخذله دمع العين وأصعد للأزرك...؟؟؟
لو ينعل الشيطان لو يجسم الحك
*****
جيبولي جدر النيل خل اصبغ الثوب
تو أيس الدلال منهم فرد نوب
*****
مثل الجدع ممدود مطلوني يمه..؟
كلما يجي ويروح بيدي أغمه
*****
ريت العمامه أحدار كش ول يامومن..؟؟؟
من كونه موش هواي لكبع وكومن
*****
وينج ووين الرجل بعدج زغيرونه
عيونج فشك مستحه للحرب يريدونه...؟؟؟
*****
خطار أهلنه منين هاشم يديه
بس لا تكوليش لا خطاب اليه
*****
مو كلشي نتمناه يوكع بدينه
أحنه السفن والريح تلعب علينه.؟
*****
آي والعرش واللوح والبلعته الحوت
نارك بلب أحشاي تلتهب للموت
*****
والحجر وأهل البيت والحج والحرام
كل ساعه من فركاك(يشكر )بالف عام
*****
غصبن عله الروح جابتني اشوفك
جثر الهه بالصدعات بلجن تعوفك
*****
مهضومه جيت أنخاك كلهم ولوني
لالي ولي بهل دار أهلي نسوني
*****
وشبعد وشخليت تنغط يالغراب
تنذجر ماتنشاف خليت الاحباب .؟
*****
كالولي منهو ذاك كلتلهم هواي
شنهو العلامه البيه.؟رف كلبي وجلاي
*****
ما نمت ربع الليل نشدوا ألمخده
وآنه حلمت بهواي خدي عله خده
*****
أحزن حزن معدان وارجي العصابه
ويه أم رجل وفروخ عوجه الطلابه
*****
يا مجوره وين تردين زينه نزلنه
كل أحنه نمشي وياج ونعوف أهلنه
*****
اليون تالي الليل لا بد عله اسباب
لو دهر موجر بيه لو ذاجر أحباب
*****
ظل ابجي طول الليل ابدن ما أهزك
لو جنت ابن هواي جان اشمعزك
*****
أتنخه بالنسوان خيه أبجن أبجن
نوبه عله ولفي الراح نوبه عله هلجن.؟
*****
شيخصهه بيه الناس رجلي أرد أجويه
يركض وره اليمشون صاير طبع بيه
*****
ربي انتجلت عليه ...جوزني حايج
يتعاركن رجليه مثل الشرايج
*****
شو دمش عني غاد ول ول يبو أركب
ليهّ ما يخلقك زين من كون ألك رب...؟؟؟
*****
يا من تبدل وياي رجلي برجلهه.؟
ونعادل أبميزان والزايد الهه
*****
لو تون لو ترتاح لو تلزم الباب
جنك جدع ممدود ما بين الاحباب
*****
أرد اللعب بدنايّ ما طالت ايدي
الفكر والشبعان خامه أبمجيدي
*****
عود أبعدت واسلاك غمك لهالراي
تعرضلي وكت الزاد وبشربة الماي
*****
حبله وأهز كاروك سبعه لي اللعبون
ما جوز آنا من هواي كلكم تشهدون
*****
من زار رجلي وجاي أنسلت خيطه...؟؟؟
خليني وي اهواي أخذلي ميطه ..؟؟؟
*****
العتب موش عليك عتبي عله لعكال
شوماكلت من أول شوط مابيه تطوال..؟؟؟
*****
والبيدي والبلكاع وعله امتوني
ماجوز انا من هواي لو كطعوني
*****
عمتك زينه وياك عمتي اشعمه
حته الهوه من هواي ما ترضه اشمه
*****
همي وهم هواي وهم الله فوكه...؟؟؟
تفتر عليه الناس جن عندي بوكه

كصاب الية أتصير وتحد سجاجين

ألذ نب ذنب الروح خاوت مجانين

-------------- ----------------

هم شفت هم سمعيت بلكلب شيبة

كلشي كدرنة عليهة بس هلمصيبة

------------- ---------------

يا كتر بدلاال خالي من العيوب

وبيا مجان يصير جرح اليجي النوب

------------ ----------------

أصبر ولو دنياك وكحة وترة أتعيل

ولا تضل مثل الريح لو مالت أتميل

------------- ---------------

أهواي تحب العين والعشك وارد

لاجن يبعد ألروح الكلب واحد

----------- --------------

هذا ألجمال منين شو عمي بلوة

هم خضر هم خدود هم شفة حلوة

------------ ----------------

كسر العضم شفناه ترهملة شدة

كسر الكلوب شلون يهل المودة

الرجل
خويه أم حجل مرخوص أتناشد وياج
كصدج طلاع الروح لو هذا ممشاج
الفتاة1
أسكت ولا مرخوص تتناشد وياي
ما يتبدل للموت هذا آنه ممشاي
الفتاة2
أرد امشي هيج وهيج حركه عله روحك
وأسحك عله الدلال والجم جروحك
*******
متعجب بدنياك دمعك سكه لوح
وآنه من أهده اليوم للمشهد أيروح
-------
دمعي من أهده اليوم يوصل عكركوف
شيلو يهل بغداد ماينفع الروف
*******
هاجن يناهي عليك وجروحي كلهن
شلحم ششل اشلون جا كلي منهن
-------
أثنعش ساعه الليل ياناهي واثنين
مانامتعله هواي دم تهمل العين
-------
عدك عكل لليل وتعده ساعات
خي عونك بدنياك بفراشك تبات
-------
ينام ويعرف النوم كلبك شمكواه
كل دكه كلبي ايريد من عندي هواه
*******
مالج فخر ياعين هليتي بس ماي
حسبالي دم تبجين يومن مشه هواي
-------
يجذب الكال العين لوبجت حكهه
لو عمت من فركاك بين صدكهه
-------
مالج فخر ياعين بس دم تهلين
عالفاركاج وراح حسبالي تعمين
*******
بالضعن وين يريد الحادي مهتم
رد وخذ من سباح كلبي وتحزم
-------
بالضعن وين تريد ريض يحادي
هلبت تكول احباب ظلت تنادي
*******
شمالك تشح بهواك وتعذب الروح
شوف الكلب تلكاه مرتع للجروح
-------
ريتك تمر بجروح كلبي وتمسه
جاكلت خويه شلون شايلهه لسه
*******
دك الدهر دكات وانخه التريده
منك وكولن آخ هذي بعيده
-------
دك يالدهر بجموع روحي أتحمل دك
لا تظن آه تصيح لما تغدي اشرك
*******
شامت وكف بالباب حاير شكله
ارتجي عل مكسور لو دمعي أهله
-------
ارتجي علل مكسور وحجي بجلاده
وأضحك ضحك بطران وحرك افاده
*******
هاك ابره هاك الخيط خويه ارد اكلفك
الجرح بالدلال شله عله عرفك
-------
شنهي ابره شنهي الخيط شنهي الريافه
الكلب لوله يشوف ولفه تعافه
-------
هاج ابرتج هاج الخيط خويه أمشي عني
لوبيه اشل اجروح جنت اشل ذني
*******
ياهديه حشي الروح جملي شجالج
الزرع واهله يروح فدوه الخيالج
-------
ياحضيري بطل النوح شالت أهديه
نوحك بعد شي يفيد واهجع اشويه
*******
ظلمه ومطر ورعيد وي عوية الذيب
كل هذا واتعناك من اذكر الطيب
-------
روحي اشتهت ملكاك يا ناكر الطيب
ما غزر وياك طبعك طبع ذيب
-------
الذيب يذكر طيب هم من تربيه
ينكلب عكرب ليش أبنادم شبيه....؟؟؟
*******
داده أخذي رجلي وياج لسوك اجلبيه
جيبيلي ابره وخيط والباجي أخذيه
-------
ما وصل ابره وخيط بعته بزبانه
متحسف الشراي يركض ورانه
*******
وتعمن والعباس بسجن يالعيون
تبجن وهمه اهناه لو شالو اشلون
-------
مالج فخر ياعين هليتي بس ماي
حسبالي دم تبجين من فاركيتي هواي
-------
مالج فخر يالعين هليتي بس دم
أرتحل عنه الجان بس بيه مهتم
*******
زين الوكت خلاك تتجه وتكوم
آنه خرس وماشوف بس الهم هموم
-------
أنهض ورد اردود واتجه وانهض
مابيه عظم اصحيح ركني الوكت رض
*******
الغربيل كضه بيد وغربله يذياب
غربل وشوف شلون مخشوشه الاصحاب
-------
غربلت وشفت شلون يتوشل اتراب
والمنبعه حر طيبه وذهب تيزاب
*******
تتمنه لك كلبين غمك لهل راي
نص كلب عندي عليل وانطيته لهواي
-------
نص كلب معلول وانطيته لهواك
عمري الحبيبي أنذور ولومتت لبلاك
*******
ريت الكلب ياهواي ينطر وراويك
جاكلت عفيه عليك دم ولحم بيك
-------
كون الكلب بي باب ينطر تشوفه
لو شفت غيرك بيه حك من تعوفه
-------
كون الكلب بيه باب وتشوفه العيون
جان اعذرتني الناس حته اليلومون
*******
اصنت الروحي وشوف دكته تكطيع
ساعه بنفسهه اسوك ساعه الهوه يضيع
-------
زين انت عندك روح وتتصنتله
لا نفس لا تكطيع روحي أسمعله
*******
فشله عله كلمن لاج من كسر العظام
آحاه اكول آحاه من جور الايام
-------
توك تصيح آحاه من جور الايام
كبلك صحت ويلاه عمري اثنعش عام
*******
ارد اسأل الحكام واهل العداله
لو مصخ ملح الزاد شتحط بداله
-------
لو مصخ ملح الزاد حط دمع العيون
اشحدهم بعد يفلان ماصخ يكولون
*******
فاله ام خمس شاخات خشنه وجديده
حطهه ابدليلي وكال اطني الحديده
-------
زين انت من داعاك بس بالحديده
وك عل صدر حط رجليه واطلعهه بيده
-------
متعجب بدنياه شجته فاله
مد ايده للدلال من عرجه شاله
*******
بسمك صحت وأوميت وعليك انادي
وصحت بعزيز الروح ريض يحادي
-------
مابيه اصيحن صوت اغمت بديه
تلجلجت بسم هواي من مر عليه
-------
لا صحت لا اوميت من مر ضعنهم
فاضحني بين الناس ما جني خلهم
*******
زمزم ضعنه وشال وانوه الوطنه
يسوه جبل لبنان صفصاف اهلنه
-------
يسوه جبل لبنان صفصاف اهلنه
كلبي انزرف وانعاب صابته الونه
*******
استاحش ابفركاك واصبح بلا راي
واتلبد اويه الراك من شوفة اعداي
-------
تتلبد اويه الراك كل خوفك اعداك
عن وجهه تلبد وين الساكن اوياك
*******
ارد انشد الطيبين منهم ابن غلآم
حظ النذل هاليوم ابعلو الاهرام
-------
هظمك وصلني يتنشد ابن غلآم
طبع الخسيس الرده والدنيه ايام
*******
البشت سكمناه للظلمه ويحوف
الما يدوس الليل ما كلب ازلوف...؟؟؟
-------
البشت سكمناه للطيبات الذات
موش اتعشي اثنين والثالث يبات
*******
جيت عله جيف وجيف لوصافي لك راي
بالتركي متحزمين شماتك وياي
-------
جيت عله جيف وجيف جيت ابنويه
جبته عله راسي يحوم طير المنيه
*******
لا تشل ببره وخيط شل جرحك بسيم
خافن رجيج الخيط ويكطعه الظيم
-------
ما ينفع لجرحك سيم شده بحديده
لا يرج بيه الظيم صبرك اريده
*******
ياألآهي لك مشجاي ياخالج الليل
هل وكت صار الراس يتبع وره الذيل...؟؟؟
-------
راس وتبع للذيل عندك عجيبه
أصدفت زينه وياه ونستر عيبه
-------
لا تعجب من الراس يتبع وره الذيل
شفت الذهب ينباع بالفحم تبديل
*******
اشلونك اشلون الدار وشلون الاحباب
اهجس جرح بالروح بشرني ما طاب
-------
يدي دمع شوغات جرحي فلا طاب
ويل تنشد عله الروح خانوهه الاحباب
*******
اشجابك شتعناك شتعب اجدامك
تسيوره لو خطار لو تشكيلي همك
-------
تسيوره وهم خطار وهم اشكيلج الهم
ترآنه لو ماجيت كلبي نترس دم
*******
ياتردس اعله الروح حسبتهن بعيد
روحي اشتهت ملكاك خبزة مجاريد
-------
روحي اشتهت ملكاك نيته ترتاح
اتفكدك مبخوت كل مسه ومصباح
*******
كل فركه صعبه اتصير انساهه وتهون
بس فركتك تيزاب صارت بالعيون
-------
الفركه مو للشوف هيه عذاب الروح
تيزابك يهون معطت كلبي اجروح
*******
حط ايده بيدي هواي هزهه ونخاني
ويكلي لا تبطيش مصبر تراني
-------
حيل مشتهي ملكاك يالهزك هواك
صبري شيفيد وياك ورويحتي حذاك
*******
بحبك صرت ملغوم وصرت انتحاري
تفجيري عل ريمونت وبيدك قراري
-------
اتفجر بذكرك دوم وعندك اسراري
كل سنه عليكم خير وتشعشع انواري
*******
هواي اريد هواي هواي اريده
ما كوم انه مناه الا ايدي بيده
-------
هواي يا اهل اهواي عذبتو حالي
لوكف ابنص الناس واصرخ تعالي
*******
عد وانه اعد ونشوف ياهو اكثر اهموم
من عمري سبع اسنين وكليبي ملجوم
-------
عد وانه اعد ونشوف ياهو اكثر اهموم
ما نصف دهري وياي بيعني الهدوم
-------
ياهم تريد اشجيه يالتشجي الهموم
صعبه اليالي وياي والحمزه ملجوم
*******
حسبالي تذبح نوك وعندك جساره...؟؟؟
ديج وتحرم بيه عمرك خساره
-------
اذبح زلم ماخاف واجسر عله اسباع
لا جن شدهني الشوك وعيونج اوساع
*******
هم شفت هم سمعيت ابهذي تدبير
الفكر جلبه يعض لو صعدله بعير
-------
زين انته انعضيت وانته عله ابعير
سابع سمه انعضيت وأجلابيه أطير...؟؟؟
*******
همك وهم الناس وهم هم الهموم
لو وحده منهن بيك ما تكدر تكوم
-------
نتحاسب انه وياك ياهو اكثر هموم
عندي بكثر دنياك والباقي مظموم
*******
لا تنشد عل الحال يوم ارده من يوم
خشبه ونبت بسمار بمتوني للدوم
-------
لا تنشد عل الحال خليهه وسكت
اشتظن بالتبليط الشجره تنبت
-------
لا تنشد عل الحال حاله اشوه من حاله
سمجه وشحيح الماي وبظهري فاله
*******
الدهر بس وياي من يمشي يكزل
بالنذل يصعد فوك وبالشهم ينزل
-------
الدهر بس وياي راجب احصانه
ويكلي وين تريد جدامك انه
-------
الدهر بس وياي جزاهه الحدود
الدين افكه بدين وداين اردود
*******
الحمزه هذا اعليج وانت امسيه
عينج تصد للغير لو بس آليه
-------
الحمزه هذا اهناه وانه بمسيه
مثل اليطب للسوك روحه طريه ...؟؟
*******
من فوك سبع اسطوح دمعي ادهديه
ودورن يالحديثات تلكن سمج بيه
-------
متعجب انت تكول دمعك سمج بيه
دمعي فاض اشطوط حوت الغرك بيه