يا ما كعدنة إعلة الجرف آنة وياك
وياما عيوني منعسة وتترجاك
وياما دموعي تسايلت من فركاك
وياما كليبي إعلة الدرب ينتضر
ياما درب لجلك طويل إكطعتة
وشكم سهم بالكلب إنت إشتلتة
متعمد بخنجر هواك إطعنتة
ومو عيب لو كتلك بعد ما أكدر
كل هذا وتريد الكلب ينساهه
وإنت بعذابك للولف تتباهه
ياكلبي ما أعتب على السواهه
أعتب عليك إنت العشكت الأسمر
أعتب ولو دمعه ندم مسفوحه
وتدري العتب مثل الملح لجروحه
هل القصه يسمر من كبل مشروحه
كل واحد اليمشي عدل ما يعثر
خليت كلبي بعلتة يتململ
جم دوب مو كافي صبر أتامل
وكليبي يسمر ما بعد يتحمل
مو عيب لو كتلك بعد ما أكدر
مو عيب لو كتلك صبر ما عندي
ومو عيب لو مكتوب بس تودي
كلبي ذهب يسمر أبد ما يصدي
وأتمنى كلب الخاني يتمرمر
أتمنى لو مرة بعد نتلاكة
مجبورة عيني تعودت لفراكة
تنساك نوبة ونوبة إلك مشتاكة
تشتم عبيرك يا مسج يا عنبر
ريحة ورد من تبتسم فواحة
ومن وجهك الظاوي يشع مصباحة
وخدودك الريانة شبه تفاحة
وكل هذا وتريد الكلب ماينتضر
* تحياتي *
