عذبني جمالك ياغالي من شفتك
وعلى صدري اضم هدومك ومنشفتك
حرت على خدك ابوسك ولا من شفتك
ولا اضمك حيل ابين اديــــــــــــــا
ايام مابينت وين الوكت وداك
ابعدك عني الزمن لو بدلت ودك
انجان ناسي الماضي ياصاحبي ودك
اني ابوسط الحشى راسم الك لوحة
وبحر حبك تاهت روحي مثل لوحة
والله ورب العرشوكتابه ولوحه
ساكن وسط مهجتي يامنيتي ودك
بحب الوطن اذكر وصّى بونه
لچن صابوا وطنّه وصابونه
بدموع اغسلنه دينه وصابونه
من كلمن زرع هالطائفيّة
شهر دهري سچاچينه وحدهه
چي مالي ظهر روحي وحدهه
شتات الوادم ودهري وحّدهه
ضدي تريد كلهه النهش بيّة
سكران ابمحبتك وانتة كاسي
وغرامك سبب علتي وانتكاسي
وسامي انتة ومرادي وانتة كاسي
واريد اربح وارفعك بين ادية
دموع العين من غدرك تجّاره
واضن حتى العشگ عندك تجارة
أهجرك ردت لنك ما تجّاره
واعوفك ويّه قفل الأبوذيّة
دليلي بنار حبكم شاعلينه
وجفاكم خبر ياذي وشاع لينه
حرگتوا گليبي گلتوا شعلينه
واضن حبكم شعل هالنار بيّة
مميز بين صحبانه وجيله
يمرمرني أحب وصله وأجيله
وجيت الروح كل ضني وجي له
شو ناري أصبحت مشتعلة بيّة
عزيز وما يصح واحد بدالك
واضن كل العشگ منّي بدالك
شجاك ومنهو العليّة بدلك
أخاف أسباب هجرك طائفيّة
ندم گلبي وتعذّرلك وردلك
واضن مكتوب من عنده وردلك
نذرت العمر بس اجمع ورد لك
واضن النبي ما رد الهديّة
شكثر ما تحب بيّة أكثر أحب بيك
ومن تزعل أحب خدّك وأحب بيك
تعرف شنهو يعجبني وأحب بيك
من تزعل وأضمّك بين اديّة
عليّه أتعاونوا خلي ودهري
وخلي شكثر متعافي ودهري
تعرف شنهو لبالي .. ودي أهري
گلبك و انتقم منّك بديّة
* تحياتي *
