محاوره بين حاتم العراقي والشاعر عادل محسن
*حاتم العراقي*
ساعة وتغيب الشمس..ساعة ويجيني الليل
وينراد حيل ودمع ..ومنين اجيب الحيــــــــل..؟
روحي حمامة صفت..وبيت اهل الدور..
اشتاگيت لأمــــــي انا .. ولخبزة التنور..
ابديرة هلي بالطعم..يختلف حتى الماي
وحتى الهوا يم هلي..يختلف والله هواي
*عادل محسن*
مو بس هواك اختلف..والماي والايام..
اتحده عينك اذا تكدر بلحظة تنــــــام..
يلي مفارگ هلك..ما تلكا مثل اهلك
انته بوسطهم علــــم..وبدونهم تهلك
بين اهلك شكد فرق عن ديرة الغربه
بابك تدفعه دفع لو رايد اطبه
بس آه يا باب الغرب فكته شكد صعبه
وين الي يگلك هلا ومية هلا بالزين
وين الي يگلك اخي شسمك ورايح وين
يلي بعدت عن هلك لا تنسى وجه امك
محد مثلهة بصدق يشعر ترى بهمك
واحلى الموائد ترى لو تنجمع يمك
ما تجي لكسرة خبز معجونة بيد امك
*حاتم العراقي*
بديرة هلي بالطعم يختلف حتى الماي
وحتى الهوا يم هلي يختلف والله هواي
كل لليلة تسوى العمر لو كعدوا اهلي وياي
ومن ايد امي الصبح محلة ستكان الچاي
يا منطقتنة حلم ارجع لأصحابي
وكل ساعه صاحب يجي ويدك علي بابي
محتاج محبوبتي الحلوه ام جفن غافي
واتمنة هسه تجي وتغفة على چتافي
*عادل محسن*
هناك من يوصلك من يغفى بچتافك
محروم من ضحكتك من بسمة شفافك
كل ساعة صاحب يجي ويدك على بابك
شكد ناس مشتاقه الك وتعزك احبابك
محبوبتك ع الوعد تنتظر لليلية
طيبة وترافه وحسن والقلب حنيه
وشما يدور الزمن وشما شفت حلوات
ما تلكا صدك ابد مثل العراقيه
*حاتم العراقي*
محتاج محبوبتي الحلوه ام جفن غافي
واتمنة هسه تجي وتغفة على چتافي
مشتاك للمدرسه والجرس والساحه
واطفال نركض ركض بس نشعر براحه
شما دار بية الزمن ابقى لهلي ميال
ومنين اجيبن قلب يتحمل الترحال..؟
*عادل محسن*
يتعب الترحال ويذل الغريب
ويا حياته شلون اليفارك وطن
شلون حال الي ترك امه وابوه
وعاف حضن الوالده الاجمل حضن
امي يا امي يا بيت اهلي الچبير
اصفى كل كلوبنة واجمل واحن
امي بالماعون لو مدت الايد
نعمة الله تفيض با كتان الصحن
