هــــــــــــــــــا ياوطن؟؟
من صاح جارك من ضلم
انطيته وكفات الزلم
ومن طحت انت وصحت
جارك اجالك منتقم
رد الجميل بسرعه الك ..
وزرع يم رجلك لغم
....
ها يا وطن ؟ بعدك تون ؟
بعدك تكابر عالجرح
ها ياوطن .. صعبه المحن
فوك الجرح خلن ملح
دورنه بالضلمه شكثر
قطرة ضوه وتخلق صبح ..
ضاع الصبح ضل المسه
وليل انذبح بيه النجم
طافي الكمر مامش كمر
والنوم خالي من الحلم
محد يشوف بهالوطن
ضاع السراب من العلم
ضلت خفافيش الكفر
تغتال اطفال وزلم
وشيوخ ما الهم ذنب
قتلوهم اولاد الزنه
واجمل بنات تذبحن
ياربي مرت جم سنه
موكالو انعمر الوطن ؟!
شو هدمو محد بنه ؟
صار الضلام ويه الضلم
اخوه وبنو الهم صرح
واحنه بدمع عشنه بألم
والوكت صوبنه برمح
جيران ما وكفو الك
عافوك كل اصحابك
واتعذبو ياوسفه ليش
اتفجرو طلابك
انخاك اضل ياموطني
حاسد بعين وصابك
كوم اوكف شمالك طحت
اذكرنه واحنه ذيابك
واذكر اغانينه المضت
وايام ذيج الي نكضت
وهنــــــــا يمن جنه وجنت جينه ووكفنه ببابك
ولف الجهل ماينسي شمالك نسيت احبابك
لاتنسه بنتك تحتضر ..بغداد بنتك تحتضر
اه ياعراق انت الاسد طبعك جبل ماينكسر
كفكف دموعك وانتفض
لتكول ابد وضعي خطر
يعراق انهض وانتخي
يعراق وينك يالنجر
نخلق صبح من دمعتك
ومن ضحكتك نخلق فجر
انته الكمر وانت النجم
رد النه بالنوم الحلم
انته العزيز الماتذل
ونت العلم شالك علم
ماضل قتل صافي الوطن
صافي الوطن مابي جرح
متأثرت يعراق ابد
بعدك عنيد انته ووكح
كل احنه صرنه اخوه البعض
سرب الخفافيش انقرض
والمرض ماضل كل مرض
والجرح ماضل كل جرح
