عنتر وعبلة...
في الناحية الشرقية من مضارب بني عبس...حيث يحدها من الشرق برميل زبالة نسيت البلديه تشيله ..عبلة شايلة ترمس الموية تملاه من تنكر القبيلة...وعنتر واقف جنبها على سيكل مركب فيه مسجل...ومشغل اغنية رضى الله وراضيناك
عبلة: وخر لا تحاتسيني...انا زعلانة
عنتر: ليش زعلانة تأبريني عبولتي
عبلة: تحسبني ما شفتك امس يوم تغمز لك سميرة توفيق في عرس الامير زهير...وانت ضحكتك تشق وجهك... يا وجه السنديان
عنتر: والله عبولتي سميرة توفيق هذه ما قامت عندي ولا قعدت...عاد تصدقين انها حذفتلي الرقم وهي طالعة ..وما اخذته والله...علشان تعرفين غلاتك عندي يا مطر عمري
عبلة: هين..قص علي بكلمتين ..وانا اغدي ملح مثل كل مره
عنتر: يلا عاد فكي التكشيرة...خلينا نسولف قبل لا يجي العنز ابوكي
عبلة: يا ويلي تأخرت ولازم امشي
فجأة يطل مالك والد عبلة من بعيد...وعينيه تقدحان شرار...وعندما يقترب من عنتر يوجه اليه بوكس على كيف كيفك...ثم يصرخ قائلا وش قاعد تسوي مع عبلة يا افدغ
عنتر: ليه كذا يا عمي...انت وش شارب
مالك: ما مداني اشرب...لكني سأشرب من دمك ...وانتي يا عبلة..انقلعي على البيت وانا اوريك شغلك.....تركض عبلة مسرعة الى البيت
عنتر: والله ان مديت يدك عليها لاروح امصع سلك الديجيتال اللي مادينه لكم...يا عمي انا احب عبلة..وطلبتها اكثر من مرة ودفعت مهرها
مالك: معصي ازوجك ياها..وانت دافعلي فيها داتسون من سنة السبلة
عنتر: اطلب وتدلل يا عمي ومالك الا اللي يرضيك
مالك: انقلع من وجهي الحين واشوفك في الانترنت كوفي باللليل ..نتكلم بالموضوع
عنتر: على امرك عمي...بس طلبتك لا تضرب عبلة لا رجعت البيت
مالك: انثبر بس
ويرجع مالك الى البيت...ويطيح بعبلة تشويت وترفيس لين غدت من صيد امس...وقالها لو تموتين ما تتزوجين هالضب...يوم الخميس عرسك على عمارة
ويقعد مالك يفكر في طريقة تخلصه من عنتر..وعبلة المسكينة تبتسي خوف ابوها ينفذ تهديده ويزوجها عمارة الدلخ...وقامت بسرعة دقت على جوال عنتر..وعلمته بالسالفة
عنتر ارغى وأزبد..وقال: هين يا عمي..تلعبها علي وانا عنتر...والله ان سويتها لامردغنك واتمردسن في بطنك...وقام أنشد:
أتاني طيف عبلة في المنام
فقلت يا ربي هذا حرام
مالك يزوجها ابن اللئام
وانا اقعد اطير حمام
شافه اخوه شبيوب حزين والدمعة بعينه ..سأله وش فيك يا عنتر
عنتر: اخاف عمي ما يرضى يزوجني عبلة..والله اروح انتحر من سطح الفيصليه
شيبوب: وش هالكلام يا عنتر...عمي وين بيلقى عريس لعبلة احسن منك..شهادة ابتدائية ودبلوم تفحيط
عنتر: والله عمي هذا يبيعني ويشتريني بكابريس...وانا مشكلتي مطفر وفلوسي كلها ضاعت بالاسهم اللي شريتها
شبيوب: اذكر الله وانطر لين يجي الليل ونكلم عمي
في الليل..دخل عنتر الانترنت كوفي..وكان مالك في التشات يكلم عمارة..عريس عبلة الغني..ويتفق معاه يجي يوم الخميس يخطب عبلة....ولما شاف عنتر داخل الكوفي...سوا ديليت بسرعة للمسجات وطلع من التشات
عنتر: وش تسوي يا عمي
مالك: كنت اكلم خويي في امريكا...ابغاه يجددلي عضويتي بالتشات..لان الكريديت كارد حقي منتهي تاريخه
عنتر: زين عمي وش اتفقنا عليه...متى تزوجني عبلة
مالك: وين مهرها
عنتر: وش تطلب يا عمي
مالك: ابغاك تروح اليابان...تجيبلي لاب توب جديد من هناك...مليت من الانترنت كوفي...زحمة وبالطقاق اخذلي دور علشان اسوي تشات
عنتر: ما طلبت شي يا عمي...ابشر
ورجع عنتر خيمتهم وهو فرحان...اتصل على عبلة وبشرها...وقال لشيبوب..روح جهز الددسن خلنا نطير المدينة نحجز اول رحلة على اليابان....
وسافر عنتر مع شبيوب لليابان يشتري مهر عبلة...ويوم الخميس راح عمارة بيت مالك وخطب عبلة ..ووافق مالك ودخل عند عبلة يخبرها...لكن عبلة رفضت وبكت وترجت ابوها...فقام ضربها ضربا مبرحا لين وافقت..وتزوجت عمارة الدلخ وهي حزينة وكئيبة
وجاها عمارة يتغزل فيها ويقولها : يا عيني على العيون الساحرات..انتي ملاك والا...
عبلة: ضف وجهك يا الشين…لا بارك الله فيك..انت ما عند الا الهش وقل العش…
عمارة: خلينا نتونس شوي يا عبلة
عبلة: جعل ابليس يونسك طول حياتك..انت وعيونك اللي تقول مصاقيل..يا ويلك ان رجع عنتر
ورجع عنتر من السفر…وراح المضارب يدور عبلاه…لكنه انصدم بخبر زواجها… وسقط على ركبتيه وهو يبكي وينشد:
ولقد بكيتك والدموع نواهل
وكومة سعابيل تقطر من فمي
قسما لامردسن بطن عماره
ولو دفعت في عمره دمي
وقام عنتر يحتري عبلة في كل مكان ..لين شاف خادمتها تمشي من بعيد... ناداها
عنتر: ماريا هل عرفتيني..انا عنتر
ماريا: مازا تفأل هنا يا أنتر...اذا رآك يور اونكل سيمردغك
عنتر: خليه يولي...وش اخبار عبلة
ماريا: في البيت تبتسي من الهزن اليك..
عنتر: قوليلها اني رح اجيها بالليل اشوفها... ورح اطب من فوق سور بيتهم
ماريا: أتشا انا لازم اروه فرن اجيب تشباتي ...وراحت الخادمة وعلمت عبلة بالموعد
وعندما اتى الليل..ذهب عنتر الى بيت عبلة..وطمر من فوق السور ووجد عبلة بانتظاره في الحديقة ...فامسك يدها والدموع في عينيه …راحت عبلة طلعت كلينكس من شنطتها ومسحت دموعه وقالت له: لا تبكي يا حبيب العمر… قال قسما لا تبيتن الليلة عند وجه الغراب عمارة… ثم خلع نعاله وامسكه بيده واقتحم المنزل على عمارة .…ودخل غرفته فوجده متلحفا…
دفه بيديه وقال له قم جعلك الماحي...يا اخي حس على دمك لا تصير جنط...طلق عبلة..ما تبيك...غصب هي يعني...رح وشف لك كشه زيك ترضى فيك
عماره: معصي اطلقها
ما كمل كلامه الا وعنتر يصكه بوكس على جبهته..وقاله قسم ان ما طلقتها لاخذ فيك اعدام على كرسي الكهربا
خاف عمارة وطلقها …واطلقت ماريا زغروده قوية احتفالا بالطلاق…واخذ عنترة عبلة من يدها وذهب الى بيت عمه…سحبه من كشته ..واخذه الى اقرب مأذون حيث عقد قرانهما وعاشا في سبات ونبات..وخلفوا عنترات وعبلاتhttp://www.bdr130.net/vb/images/smilies/icon_wink.gif
وتحياتي
