خلوني ابلع موس - الشاعر مهند الهاشمي
جرحوني بكثر خلوني ابلع موس وانه ويه الجرح اتفاخر واشدي
واذرف بالدمع واجمع جروح الصاح واغسل بالگلب دمع الغسل لحدي
انا شما غيراني الوكت والضيم اضل اصل الوصل واتماسك لوحدي
انا الما خفت غدر الوكت فد نوب بس اعرف خويي واعرف العندي
موكافي چذب خليني احجي الصار واتعلم درس وارسمهن بخدي
وادرسهن عدل واجوي دليل الخان لانه شما صعد ما يوصل لحدي
اقسم بالوفه ما ضيعت فدواي طبع ماي المقل شايلهم واهدي
بلكت غزرت وافرح من الاگي الصاح واشتل للورد واصلي الورد وردي
خلوني اعترف واحجي بصراحه شصار صاح الوكت لايرحم ويهدي
خلوني بصمت ويه الجرف مرتاح ما اصير البحر ومعانك لسدي
خلاني الوكت اكتب شعر للناس لان هذا الجرح موش القصد قصدي
اقلامي العلت وانه البقيت الماي اتگطر ندي وما اجفل بسدي
مسموع القصد كلكم عرفتو شلون بس انه الحرت ليش الشعر حدي
مرسون وعذب مايعله فوك الناس بس اليستمع يحجي بسمع ردي
ماهمني الحجه ولابطليت دواي لان داوه الجرح وصار القلم ودي
الشاعر مهند الهاشمي
