اكسر باب كلبي
لاتزعل علينه گلوبنه تذوب
ماتدري الزعل شيسوي بينه
مثل ماتنذبح شمعه بسهم ريح
عصرنه الليل بعدك وانطفينه..
گلنالك نحبك تزعل شبيك؟!
عسه لاگلنه عمي ولاحچينه
مدينتنه ظلام وعينك هلال
دفك شبّاچ عينك عالمدينه ..
يطيحن فوگ اديك سنينه دموع
وغير وداعك شطايح بدينه
گمنه نخاف من عيونك عليك
گبلك چم نهر كاتلته عينه
ولاتضحك ضحكتك ترست البيت
عيون البيت تحسد مو أمينه
ولاتبچي أعله خدك لؤلؤ يطيح
أحنه بطرگ خدك وانعمينه
أكسر باب گلبي بعينك وفوت
المايفتح ألك تنشل يمينه
واوگف لاتدگ باب الگلب نار
بس أشرلي بيدك وانه افتحه
كتب گبلك جروحي ودمعي والآخ
أعله مودك شگگتهن صفحه صفحه...
مو حسبالك أضحكلك بطر.. لا
ولا آنه الخلي وبجروحي شحه...
بس ضميتهن حته أنت ترتاح
وحته احساس (أحبك) ماأجرحه
فرحني بعد لاتبخل وياي
گبلك ماشفت بالدنيه فرحه..
خناجر كلهه چانت گبلك الناس
واخرهم شهگ يم گلبي رمحه.......
اريدك خلگ سيف تجيبلي وياك
وخلگ الذكريات البيه أذبحه...
حته انسه النسوني وسدوا الباب
شكتبوا وشخذوا من بالي امسحه......
وارسمك يم صفنتي عيونك تصير
لوحه الماطرت من عدهه لوحه
وندوخ اثنينه ومانصحه للموت
نصحه المن! عمر مايسوى نصحه
تحياتي
