تريد انساك كلي شلون انه انساك
هم شفت النهر لحظه نسه جروفه
انت كتاب كلبي واضح من اقراك
بدموع اليالي انكتبت حروفه
ياشمعه درب تضوي على العشاك
من بعيد نورك يشع وانشوفه
ياكلك حياتي وكلي انه وياك
خل حبك جرح للموت ماروفه
يل طبعك كمر واتسامر النجمات
لو عنهن غبت تتنطر طيوفه
ياحاتم كرم معروف صيتك دوم
ديوانك يرحب دوم بضيوفه
يافرحه امل لو تمر بين الناس
احس بغداد عدنه الليله مزفوفه
ياناي الحزن بيك انعزف موال
وكلماتك لحن مامنهه معزوفه
مو انت بحياتي صرت اليه الروح
وهاي الروح مثل الشمس مكشوفه
لو عني ارحلت اي حال امرن بيك
مثل حال اليتيم ودمعه بجفوفه
واكلك شوف وكتي شسوه بيه اليوم
بكليبي بقن طعنات لسيوفه
