ليش غاب الكمر بس عن العراق
اوليش ضاع اهلالنه ابيوم الفرح
اوليش بس يوم الحزن عدنه دقيق
بالثواني انعرفه من ينزف جرح
اوليش مانعرف نرتب بالبناء
اوكل تفاصيل الهدم ننطيها صح
اوليش من نضحك دمع عالخد يسيل
ابد ماصدك دموعي امن الفرح
لان دمعات الفرح تروي البشر
وانه من دمعي يشك خدي الملح
هاك امسح وجنتي ابئيدك تعال
اوشوف عينك بعد يحتاج المدح
كبل جان ايخاف من صبحه الظلام
اوهسه كام ايخاف بالظلمه الصبح
اني ماكابر وريد احجي الصحيح
كلشي اصبح بالعراقي منفضح
والجواب الكل سؤال اهل العراق
اهلالكم يبحث عليكم بالسطح
ونتم ابظلمه او ابد ماشفتو نور
او بعد كم يوم الشمس هم تنمسح
وانه خايف يوم مانلكه العراق
او لانخيل انشوف لانلكه سفح
لان ماظل كوكب اليقبل حياة
الليل يطلع عالبشر وكت الصبح
او لااله الكون يقبل عالعباد
ابلا ذنب اطفال رضع تنذبح
هذا وزنك مثله ماشافت امم
يالعراقي اشلون ماكيلك طفح
