يرابي بنص ترافة أخدودك شموع أخاف النار بيه تلوح خدك
لأن أدري الشمع مكتوبلة يموع وأذا ماع الشمع ينثار شهدك
يتمثال الزبد ماتدري بالجوع مايعرف صبر لو جاس حدك
تتناسة العيون وغزل مسموع وبمكر الورد يتغاوة زندك
يل كلك ورد من ياهي مصنوع أشو مامرنه بالتاريخ وردك
ألآهك كملك سواك موضوع غطاك بخمر وبعسل شدك
بقة يرسم بسمتك يمكن أسبوع رسم شي من صفاته أدور هدك
ونحت طينك نحت موبيده بدموع خلق منك خرافة وضاع نردك
رادك مومثلنه اتصير مشروع ولهذا بأمورك يمه ردك
ياهمسة ثلج بشفافك تضوع عمي بلا زعل كاتلنه بردك
لاتحجي بحضرتي الحرف مرفوع حرفك جمداني شلون سردك؟؟
تره ناري عنيده بحدر الضلوع من أبرد أفور بنار ودك
لاتفتح مجال وآنه مجموع وحدي وياك وأنته وياي وحدك
لأن ماخاف طبعي وخوفي مشلوع أخاف أطمع بعد وأترجه نهدك!!
أخاف أطمع بعد وأترجه نهدك!!!
