عليك الضيم چان امقفل اقفال
وما غير أبد صار المفاتيح
لأن حسيت عندك واهس اطفال
صرت العيد يمك والمراجيح
ليلك چان أظلم يرعب ارجال
وانه بچفك صرت سيف ومصابيح
لأن انه وفي وما غرني المال
ولا بعت الوفه حتى بتصاريح
ما عفتك وحيد بكل الاحوال
عبرتك نهر غرگ سوابيح
ضنيتك تضل للموت وياي
ما تتركني لحظة شما عله الريح
الفخر مو للسفن من شگت الماي
الفخر يرجع وحگل للملاليح
واضربلك مثل وانته اقنع بهاي
الأرض بوره تضل بعد الفلاليح
تمنيتك تكون الطيبي وفاي
وما تقبل أضل ويه المجاريح
تعرفني أبد ما فارگ الناي
لأن شوغات بيه امنلمذابيح
أنه الشلتك دمع بطراف العيون
ورغم جور الزمن ما عفتك تسيح
ومن شفتك وحيد بنص يكرهون
صرتلك شوك بعيون التماسيح
ولك حملي ثگيل وهد المتون
وعلي شماتي صاحت رايح يطيح
وانه الضنيت تفزع عاليصيحون
چا أنته شجاك وياهم تصيح
أعذرك من تخون اويه اليخونون
لأن عنصر الغيره بگصتك شحيح
