(غزل الوطن)
يا نسمة عشك ترسم خيال الروح
وياطير الحنان العاش بسمانة
ويالبيك الوصف متعلكَ ومحتار
شوصفك طير بيك احتار جنحانة
أعد أميال حبك بية جن ساعات
وأحس كََلبي إعلة نبضك وردة خجلانة
فتح بابة الكَلب يتنطر لممشاك
إدخل بالعجل لا تدك بيبانة
أهل الكَلب إنتة مو فرد خطار
إلك فنجان كَهوة يصبة شريانة
كلامك سحر يجذب بيه مية إحساس
وعلى شاطي المحنة هناك ودّانة
غركَنة بنص هواك إنصيح ماكو الصوت
شبه التايه المالاكَي عنوانة
عشك لفني وية روحي وتضل ساكن بيه
وإنتة الخير فيضة سنين راوانة
عليك الكَلب ينزف شوفة هايم بيك
وشكة العيني بحزنكم والله بجانة
تمر كل العواطف تيَّهتة بليل
عطاشة بحبك إنتة وحيل ظمآنة
إلك كل المحبة إتجمعت وياك
وإلك إخلاصي كلة بلوحة إعلانة
يا مهيوب باسمك ينحنيلة الراس
يالماشي بنصر ما عاف عدوانة
يسابي الحال بية شلون بالله وياك
شجازيك وشكَلك روحي حيرانة
جان الينجرح بيدك تضمدة بخوف
وجرحك هسة بير ومنهو داوانة
هذا إنتة الوطن شهكَة وصرت بالروح
لأن ما أعتقد في يوم تنسانة
