مد اجفوف شمسك بين الغيوم
وكلهه اتفل شعرها اعله الروازين
وخل ليلك يلملم بيده النجوم
ويطشهه ويي الفجر فوك الحياطين
ومن اخيوط فجرك سولك اهدوم
وعن اعيونه ضم النياشين
طحت ماكول عنك خاطر اتكوم
وانه ابصورة وكفتك تارس العين
المنايه الفوك بيتك كامت اتحوم
كلهه ارواح ولدك وفت الدين
وكلهه الورد مايتحمل اللوم
يتامه اتصير بغيابه البساتين
ولدك ياوطن وي الفرح كوم
وشابت من قهرهم روس السنين
ابنك ليش بيك ايبات محروم؟؟
وانت اعليك نزلت سورة التين
فرات انته حرام اتعيش ملزوم
واكبالك تشب نار اخيم حسين
بيدك كاس بس ياكاس مسموم
وعله اطيورك هجم جيش السجاجين
ماخاف اعله بيتك ينزل الحوم
اخافن بيه اتعشعش بومة البين
ظالم مامتت جي عشت مظلوم
لان مانصفت اوياك السلاطين
واحد جان بيك وغدرته الكوم
علي الامنت بفيايه المساكين
بيك اتواجدو جم نبي ومعصوم
اشلون اتعوف كاعك للشياطين
صرت مثل السمج ماكول مذموم
لان عطرك ترس رية الجوانين
لان عطرك ترس رية الجوانين
