واضح انه احبك .. صعب هلتفسير ؟
تعبت الفكــــر .. يمته الفكــر يصفه
تعبني الكلب قَدمت شكوه العين
مشغول الكلب .. والعين ما تغــفه
ولك عطشان أحبك مو جرح ويطيب
ولا غيرك طبيب وتدري بيه أشفه
ولك كب الكلب جا يمته توصل ليه
نحل جدمي وتعب ما يحمل الوكفه
يلمدلل .. تدلل بالكلـــــــــب جــلاب
تعلك بالكــــــلب .. زيد انته بيه نزفه
سكران .. العيون أتشوفك أمــن بعيد
أموتن .. لو تصير .. ألشفه علشفه
يلمدلل تعال أرحــــــم ..كلب حيران
شرد مني الفكــر .. والعكل والعرفه
من جيت اتكــــــلب أرحـــم ألحبوك
يلهودج .. تمــــر .. جــن رايح بزفه
جيت أسالك تايه .. وينه بيتك وين
هـذا احذ َ الكمر بيت الردت وصفه
وَخـر ..عني كالـــت لا تشوف الناس
شمالك ترتعش .. جن صابتك رجفه
مو حقي أرتجف من شفت حور العين
ولج حتى النخل مال ورجــف سعفه
ولج حتـــى الورود استحت ما تدرين
من شافتج كالـــت شنهي هلتحفه
ماجن تدري ما ضـــل بالعقل دولاب
من شفت الكمر نازل علــى الضفه
من شفت الشعر ليل الكمر بيه غاب
طايــر ما تكضه ألشـــــده ..واللفه
صحت شنهي أنحجب ضي الكمر لو غاب
كالتلي الكــــــمر ما ينحجب لطفـــــه
مـن دارت عليــه الكمــــر غطـــه العين
أمنــت الكمر مشعـــول .. ما يطفــــه
