هي هاي الدراسة وهاي تاليهة
عندي من السوالف كومة احجايات
ماتخلص بليلة ويوم واحجيهه
وعندي من الدموع تفيض الكيعان
اغركم صدك لو ردت ابجيهه
عشرتنه انتهت واحنه بربيع الروح
صدك هاي الدراسة وهاي تاليهه
صدك نترك بعضنه ونمشي مكسورين؟
ورواية يصير حبنه الشعر يرويهه؟
روايتنه حزينه وموش بيهه افضال
واغانينه تضل محد يغنيهه
بس تمشي انته عني شيضل بالوجدان
وهيه الدنيا بعدك يا حلو شبيهه
شتبقى الذكريات؟ الذكريات تروح
ومن ينخبط حاضرهه ويه ماضيهه
كلي شبدر مني وراح عني تروح
وروحي ليش انته لمنفه تنفيهه
وليش انته من اديه اتبخرت ياماي
وليش خطوط اديه تريد تمحيهه
اذا ناوي اعله كتلي ميت من اسنين
اعله روحي الفاتحة من الزغر قاريهه
انه من الطفولة موقع ويه الضيم
ومن عيني بواجي ودمع منطيهه
بس من شفت طولك كلت اجاني العيد
فرحت وفرحتي اكبر من معانيهه
حسبت احساب اعيش العمر كله وياك
ما دامت الفرحة وقلبي حس بيهه
وهسه تريد تمشي وترحل ويه الريح
وعشرتنه حطب للنار ترميهه
اول خطوه تمشي انه احترك بالنار
وغيرك ناري من يكدر يطفيهه
يابو عيون العسل والله لو تنباع
اليوم عيونك انه بروحي شاريهه
اخذني وياك جلمة بشفة ما تنكال
دمعة بعينك وجفنك يغطيهه
قصيدة وياك اخذني اقراهه من تشتاك
بين اوراقك المجروحة خليهه
احبك كلمة صار اسنين بيه تعيش
بس اوكف كبالك اخجل احجيهه
وهسه اسمحلي اكلك ولو باخر يوم
وي اخر دقيقة اكبالك اكضيهه
جنت اسنين انه احلم وافكر بيك
وقصور وياك من الشوك بانيهه
راح انه اضل مغرم متييم بيك
احس بعيونك واتمنه الاكيهه
وتضل لاخر نفس ذكراك بيه تعيش
وتبقى بكل جرح بجروحي اداويهه
اموت وروحي تصعد وانه اموت اعليك
ولو روحك تمر يم روحي تحييهه
احبك هذا اخر شي اكلك بيه
خل روحك حزينه وروحي خليهه
فتحنه من العشك صفحة وكتبنه اشعار
وهاي الصفحة لازم هسه نطويهه
ونودع بعضنه ونمشي مكسورين
لان هاي الدراسة وهاي تاليهه
