حلمان
***
حلمان رافع علم
يوم الخميس الصبح
وجامع هموم الوطن
وعالن عليهن صلح
كلهن رضن بالحچي
چي لنه گلبك سمح
وبساحة المدرسه
كيفنه طاب الجرح
بس الحلم شو بطل
من كثروا اهل النصح
وزودوا هم الوطن
بجروح ماتنمسح
كلما اطيب جرح
يداويني جاري بملح
***
من چان بيدك عسل
چم شفه اجت باستك
ومن چان صوتك شجي
وعلو النخل هامتك
جوك بمعزه چذب
وصفگوا يم دجلتك
ومن غدر بيك الزمن
صعدوا على نخلتك
وبكل دنائه وحقد
گصوها الك سعفتك
واعلنوا شارة نصر
من لگطوا تمرتك
الله ياهلوطن
كم جار الك عاندك
بلبل كظيت العمر
وماشفت من صادگك
اصبر بعد ياوطن
عندك زلم حبتك
تبقى المعزه الك
غربان اهي الصادتك
