قلم يكتب .... للحلم
مره اشوفنك حلم ..
...... ومره اشوفنك قلم
اكتب ابخطك حروف اشعاري
وكلّك ابروحي قصيده ..
...... وقافيه كلّش جديده
اتضوي بالي وتستعيد افكاري
مره اشوفنك صحيفه ابلا صور
........ ولا مقاله وبيها يتمتع فكرنا
بس اشوفنك سطر..
او بيها غنى ..
ابطور حياوي .. او بستته
( انه ما عندي صبر )
اطوي ليلي وياك سهران ابمحبتك
........ وانت ليلك ساهر
ونجم عينك فسّر احلامي ابنظرته
وصرت بسمك شاعر....
....... انه شاعر .. من مشاعر
يمكن ابوصفك حبيبي ..
ما ابالغ ما اظاهر .......
انت لؤلؤ ساكن ابحر الدموع
....... وانت نسمة ريح
تلفحني واذوب ....
وانت كلك فوكَ كلك .. ما ابالغ
لو كَلت كلي انه كلك ..
انت لون من السنابل ....
........ حان وكتك للحصاد
زاهي.. تتنومس شعفتك..
....... كذلتك ليل السهاره
او وجهك اينور المكان ..
ابلا معـــاد ...
اليوم اريد اوياك اذوبن .. انه واسكر
........ خلني اسكر
والثم اشفافك حبيبي ..
الطعمتها ابطعم سكّر ....
واغمض اعيوني ابصوّرك
وابقى بيهن بلشوارع ..
........ معمي افتر
سجلت عنوان حبك فوكَ قلبي
........ وطرزيته ابخيط ناعم
تدري ليش ...؟؟
حتى من ينكَطع خيطك ....
روحي من يمي اتوذر ..
وبعد اكثر ......
مره الوم ابروحي ساعات الفجر
ومن ملامة روحي ..
اصبغ فرحتي .. ابلون السواد ..
وحزني سطرته الك ..
خط اعلى دفتر..
ومره احجي وياك وانت ابلا وجود
....... ومن اعاين
للشمس لحظه ابنظرتي ...
بيها اشوفنك ضوه ..
او منها ايتكسّر ...
اكتب اسمك من ذهب بخطوط حبي
...... وما نسيته
لأن لو انساه....
راح انسى انه اسمي ..
او سطريته ابممشى دربي ..
خلني ساعة فجر بعيونك انام ..
وبيك احلم ...
........ حلم وردي
ومن افز الكَاك بعيوني حلم ..
...... وانه المنام
حرت من طولك حبيبي اشلون افصله
...... كَلت اوصفك .. مثل نخله
والسعف جنها كصَيبه ...
اتعانكَت وي ماي دجله ..
والحواجب من خجلها ... اتكَبعت
او شيلتها صارت احلى كذله ..
وما الومن روحي جيفن حبتك ..
........ أوعيني لمّن شالتك
فوكَ الرمش .. كحله حزينه ..
لبست اثياب السواد ...
او ضيّعت كل فرحتك ..
وهسه اشوفنك حلم بيده قلم
ينظم ابحبك جميع اشعاري
........ ابلا ندم
........ ابلا ندم
