أحبك من صغر عودي وسني
ومن حبك سقط شعري وسني
على حالي بچه شيعي وسني
وثالثهم مسيحي يون عليه
عيني العمت لو جيتوا تراكم
وعليهه الحزن ودموعي تراكم
حزنكم رايد اسالكم ترىكم
يعادل حزني والي صار بيه
وحك أم الكرم والطيب حديثه
أريد اكابل المحبوب وأسمع حديثه
أريد أعرف قديم أخباره وحديثه
وبلياه الزمن ناعور ودار بيه
احبابي شلون حالتكم بعدنه؟
شبدينة والوكت عنكم بعدنه؟
اذا انتو نسيتوا،احنةبعدنه
بذكركم كل صباح وكل مسيه
روحي من الهجر ملت وسالت
عليه احباب لانشدت وسالت
الف دمعه الجرت مني وسالت
ولادمعه الجرت منهم عليه
حياتي عكب شخصك شلي بيهه
وجميع اعضاي صارت شلل بيهه
توديلي رسايل شلي بيهه
اريدن شوفتك والكعدة سويه
دمــع عيني علـى الخدين .. جاري
وجرالي الما اظن بالناس .. جاري
ريـت اللي احبـه يكــون .. جاري
واشوفه بكــل صباح وكــــل مسيّه
سابيني بجمـــاله اوطول شعره
انا اموت من اسمع ابيات شعره
انا بيني وبين المـــوت شعره
حبيبي اشوكت تلــــــحك عليه
خزرة عيونك طير شاهين
عليك الروح والدلال شاهين
يالجمالك صعد فوك الهام شاهين
والك نبيلة عبيد تأخذ تحية
نشدت الناس عنك وانت هينه
وعلى فراكك تلفنه وانتهينه
الكلب انت تعذبه وانت هينه
ويضل اسمك حلو وغالي عليه
غاب الكمر من شافك ولا هل
ولغيرك ما نزل دمعي ولا هل
مالي دار من بعدك ولا هل
عزيز ويصعب فراكك عليه
يانور العين مرسالك وصلنه
ودمع العين بلل كل وصلنه
امانه عليك لاتكطع وصلنه
وخلي دوم عشرتنه سويه
الك ياما نبض كلبي ودكلك
واطحن بالحجي ناعم وادكلك
شكدباليوم ارمشلك وادكلك
درمش بالجذب مره عليــــه
عذرا لون روحي .. حاسبتكم
لانكم جزء منه .. حاسبتكم
بجاه الحسن تعطل .. حاسبتكم
شاشه وكيس والفارة سويه
أظل أكتب شعر للطيبين وأنشد
وأسأل على الصاحب دوم وأنشد
وأصير حزام وكت الضيج وأنشد
لكل عزيز وغالي عليه
انا الصياد صادتني شبكتك
دخيل الله شكثر حلوة شبكتك
ادك عليك مشغولة شبكتك
كتلك بالجذب بس رمش عليه
افكر بيك يا حبي ولا انام
ولا غمض جفن عيني ولا نـام
احب اكعد يمك ولا نــــام
بعيد وشوفتك حسرة عليــة
تظل نجمه ياضي العين بسماي
ويضل اسمك صديق العمر بسماي
ما يروي العطش بجفاك بس ماي
العطش ترويه من تسأل عليه
هاك الكلب بيدك حيل طحنه
أمس فوك النجوم واليوم طحنه
شبدينه وبالعشك ياناس طحنه
غشمه وكلوبنا تحب الأذيه
تحياتي:Smiles Lot 1 (11):
