الواحد فرد ما يقبل التقسيم
بس اني انقسم وبدونك اتعدد
اتقسم بدونك وانجمع وياك
لأن كلي وية كلك بيك يتوحد
جنت جاهل واجيك اتشرد من الناس
هسة اتعلمت من نفسي اتشرد
عشكتك ذرة ذرة وصرت اغار اعليك
اذا محد يبوسك اذبح المحد
ولك لا تنطرح يم ناس تعبانين
مو طولك حصار واشلون تمدد
وجبينك ايد موسى
المعجزة البيضاء
مو حقة الكفر من شافك اتعبد
وشعرك ليلة ظلمة اتوحشت عالريح
اشما هب عليهة اتلفلفة باسود
وفراشة نور اسمك اذنك
والزلف خطاف
مرة ايحط عليهة ومرة يتبعد
وجفنينك سمة ومجفي اعلة رمشك ليل
اذا ترمش يظل فرقد يطك فرقد
يالعينك بحيرة ابكل هدوء الليل
وادموعك نوارس لو مشت عالخد
وعلى اخدودك صور منقوشة من بوسات
اباوع بالصور مابايسك احد
وشفتينك شمس من تبتسم نصين
يكطعهة البرق وابنصهة يتجمد
وحنجك صدر بجعة انصاغت من النور
اذا ماتت شمس من نورة يتولد
ومثل زمزم ركبتك نص ذهب نص جام
وعين الماي هاي العالصدر تركد
وانام اباب صدرك واذنب وانخاك
كبتين الذهب ماتشفع لأحد
يبو ايد الثلج لا تطلع ابتموز
موخاف الثلج خاف الخلك تبرد
واذا لا مو ثلج كل هالبياض امنين
معقولة العظم فوك الجلد يصعد
يالجتفك منارة بيا شرع يا دين
اموت من العطش واكبالك اتشهد
وحدر جتفك فرات ودجلة ملتقيات
وشفت شط العرب جوة الجتف ممتد
واباوع عالبطن مو ركبت الدلفين
لأن عين الحياة بفرضتك تركد
يبو ساك الكطن ليش افتحتلك باب
مو خاف الكطن بالعين يتفرهد
خطواتك حضارة وخصرك التاريخ
اذا تمشي العرب فوك الفرس تصعد
وعلي كلما تمر يجبرني حسن البيك
اوصفنك لكن من وصك اتردد
لذلك ماوصفتك واعتذر يهواي
وصف الخيال المنك اتولد
