ارجف للصبح بين البرد والخوف
واضل متاني بلكي اليه تعود
يل مبعد علي بدونك مامرتاح
والحزن بغيابك خلاني بس عود
ياوسفه الزمن صارلي صياد
وبشباج الزمن صرت آنه مصيود
حكمني بالفراق وخذاك مني
ومشاني بدرب المنيه بدون ردود
وحط بيه جرح بفركَـتك يهواي
امشي والجرح ضل ينزف جبود
وينك حبيبي لاتتخلى عني
دشوفه كَـليبي من الحزن ممرود
محتاجك تعال وشوف حالي اعليك
دموعي والليل ويه النجوم شهود
اون وابجي وانادي بأسمك وينك
ايامي بغيبتك صدكَـني معدود
يلاحكَـني ذبحني الشوكَـ دمرني
وعلى درب الالم والحسره مكَـيود
نكَـضت وما بعد ضل بيه نكَـل جدام
وحيلي منهدم وساعاتي وحشه وسود
بسبب بعدك وحبك نار بيه النار
بين ضلوعي نارك طفي نارك
تعال ارجع حبيبي ارجع شبيك
وخلينه الفرح والحزن نتشارك
تعال اتوسد هذا الصدر مأواك
وذرعاني المخده والكَـلب دارك
وألك الروح يرخص وكل حياتي
واغلى ما املكه اعليك مبارك
تذكرني وشوف اشكَـد الي تشتاكَـ
يهنيال اليصير بالفكر خطارك
يارقة سنابل يامياسم ورد
اي مو حقه الكَـمر وياك يتعارك؟
اي مو حقي البسك كَـلاده سبع اعيون
وابعد العين عنك بليلك ونهارك
لأنك مو طبيعي وكلشي بيك جنون
يابحر وتفيض العسل بأنهارك
يتمثال العشكَـ والناس يزوروك
بجمالك جننت آلاف زوارك
يا اجمل قصيده وكلشي بيك اسرار
ياشاعر كَـدر يكشف اسرارك؟
انكتبن اشعار بحروف اسمك
بطول الدنيا انكتبن اشعارك
متعجب من الاهي شلون سواك؟
قادر يا الاهي عجيبه اقدارك
سويت الحبيب من عسل لو من طين ؟
لو خلقته من جديد يوسف بأنوارك
