اذا ناوي البعد ..ومتعبك الحال
بكيفك عادي ظلت ابعد وروح
ليل بلا گمر موحش ترى يصير؟
وبلايه الوجع ما تحلى الجروح
عمي انته حلو ومدلل هواي ؟
وانه من التعب حته وجهي ممسوح
بس يوم العرفتك چنت تمثال
وبلمسه جناني انطيت الك روح
دللتك دلال الأم للصغار
والخاطر عيونك كلشي مسموح
ما محتاج منك اعرف شصار
متعلمه اليتامى ودارسة النوح
وگبل ما تبتعد بس عندي چلمات
بگلب مجروح اوگف خل احاچيك
بگد طيبي و وفائي الشفته وياي
تتحسر على الحنيه اخليك
ولااعتب لان بيك انا مخدوع
اعتب عالزمان الجابني عليك
وراح تشوف باچر سود الايام
وخلي النار بضلوعك تشب بيك
وغلات دموع عيني الصبن عليك
وحگ ربك كثرهن راح ابچيك
