جـــــــــرح الابابيل..
............................
أشكــد خطية السيف بيدك وانتة ماداخل حرب..
اشكد يصعب رحيلك لونكت بيك الدرب..
وانة كد جروحي كلهن..عندي مابيهن صعب..
حملتهن..عين عين..وسلمتهن روح متروسة ذنب..
ومااسولفلك عليهن..هنة عدهن بيت روحي مستقر..
والقهر عاهدني مرة..ومانكت بيه القهر..
رغم فرحي وياي باقي..وابدا مايشبع قهر..
سولفتلة اعليك مرة..
صبت عيونة نهر.
وسولفتلة اعليك اخر مرة.مرة..
شرب روحة وانتحر..
وكال نتبارة الذمم.. كتلة سد بسد ضحك..؟؟
كال تطلبني شهر..
وانة وكعت الشهر..
......
يابعد ..ماظن بعد يسوة العتاب..
وانتة شالع باب روحي..وهسة روحي بلاية باب..
تريد تطلع..روحي تطلع..تريد ترجع..لا لترجع..
لاترد..؟؟ ماضل شباب..
الكمر لوغاب يرجع.
.يشيل جف الظلمة ويخضر ضوة..
وانتة اول من كسر هاي القواعد..
غاب بس مارد هوة..
ياكواغد..والكواغد..
جانت اوراقي الجديــــــدة.
.(البيها شاعر ايدة بيدة..حتى من يضحك تحس الضحكة بيت.. وحتى من يبجي تحس ضربة جديدة..)
من غبت لليوم..تسمه كواغد..
مثل ماهسة النفس نازل وصاعد..
وانت كاعد.. فاتت اللحظة دقيقة.. اشكد(دقيقة)
من كثر مابيها مفقودة الحقيقة..
حسها جامد..؟!!
ادري ماتفهمني..مو مشكلتي هاي..
وانة من كد العطش ..كمت ابجي ماي..
وسولفت ذاكرتي يم.ذاك المجان..
جفك اعل الشط نسيته..وانة جاي..
..
يااابابيل...الترد جيش ابرهة..وترمي الحجر..
ياابابيل..البعد تحمل امانة..
وتنطي للكعبة جذايلها مهر..
اقتنعت..؟
اقتنعت بجيش ابرهة...وعشكت (سقر)
.........
ليلك..الليل العشكتة..
فضحت اعيون النهار..
وانكشف ستر المنصة..
ولاذت بسد الشعار..
وكون تدري..شجان يرمز هالشعار..
جان مكتوب بدمعتي...ودمعي نار..
(تقيم دائرتي لجروحك مهرجان)
نحن اصحاب القرار..؟؟
وفجاءة صوتك..صفك لروحك خطية
واستحيت ودنكت خجلان منك..
ريت كون البيك بية..
ريت كون الفشلة تتحول سجية..
وبيت من الابوذية..
راح اسمعك ابوذية..
(عصية الروح لاجن..سلسة بيدك
وعلى كيفك بعمري..سلسة بيدك
كضت عشرتي وياكم..سل سبي دك
عشرة شام وي الغاضرية)
واستحيت احجي البقية..
خايف اتكول السوالف..
جلمة خنكتها الشفايف..
وخايف اشكد اني خايف..
؟؟..
تسمع اعيونك دمعتي..وماتطيح
وتاخذ اشفافك اشفافي..وماتصيح..
وانةاريدك تستـــــريح..
يل جدمك من ملح..كحل جروحي.
ويلي باب اجروحك ايطل اعلى روحي
..
هاك بسمارك غلط دكة صحيح..
دكة بين اضلوعي مااكلك جريح..
للشاعر العراقي خالد الفراتي
