لا تصفن
لا تصفن تره تنزف الصفنات
وجرح الصفنه ما عاش اليضمده
شوف السده رغم تعارض الماي
بس الماي يضل شابك السده
امر عليك ركبه تمر علي سيف
وتريد بلايه دم سيفك احده
ردت مده ويه غيرك حته انساك
اكو غيرك شفت بس ماكو مده
ويا مده التفيد وكلبي مشلوع
ورغم مشلوع وانته تعيش عنده
احبك واجب واكرهك ممنوع
اشوفك مو حلو بس عيد ارسمك
اسولف ويه اهلي بغير موضوع
اهلي اسودنو جي جبت اسمك
احسك مدري شنهي ابين الضلوع
اكطعت نفسي وتفرض علي اشمك
اتلوه من ثمك حقي موجوع
وما ترضالي اتلوه من ثمك
وتطشرني بحقد واتصيح اشاقيك
وافرح بالشقه والتم واضمك
بكيفك .. بكيفك سوي كلشي
اني غلطان لان اني الكلت لك كول كيفي
اذبحتني وسيفك انته بدمي غركان
وتطالبني ودكلي جيب سيفي
اذبحتني .. اتمنه اشبكك من منو تخاف
ما خفت الله خايف من نزيفي ؟
كل حيفك اخذته مني يا فلان
واكول يا حيف ما كملت حيفي
اعزاز طيوف كلبي ومشو الاعزاز
ولا واحد بقه بس انته ضيفي
بعدك بالكلب رغم الخلافات
المسافات انلغت بينك وبيني
ما ينطيني كلبي ازعل وياك
بس ان شاء الله كلبي ينطيني
اتوقع يجي فد يوم انساك
بس اتمنه اموت ما يجيني
اعرفك مو الي بس اني اهواك
لان انته الوحيد المالي عيني
اريدك انته اي شي يغطي العين
حته ما تصد بس الك هيه
واريدك عله بيه وكل ما بيك
اني وياك نتعاون عليه
واريدك انته ريح اتصير واحبال
وتهزني الريح ويفلتن اديه
حته اتطشر اني بكل الدروب
حته منين ما تعبر عليه
