لمحتلك.. الف مرة
وانت تعرف غايتي وما طاوعتني
وسولفتلك سالفة عاشگ خجول
وانت تعرف هو ياهو وماعرفته وخجلتني
وسولفتلي اعله الحرب والموت والدم والضحايا
وكلمة المحتاجها ما سولفتلي
وكلشي گتلي
وكلمة الميت عليه
عاندت روحك عليها وعاندتني
وبينن كلهن عليك
وانتفض وجهك بوجهي وصيحتني
وضيعتني...
وهسه من طاحن اسنيني اتذكرتني
ليش من گلبك رجف ما صالحتني
وشبيك من عينك خذتني
اتذكرت موقف بجيت وطيحتني
ومن اجيتك .. حتى بحچاية جذب ما جاملتني
وانا جيتك ..
غاسل جفوفي بورد من سلميت
وانت غاسل جفك بماي الغرور من صافحتني
وكل شي ما بين عليك
وانا حتى هدومي تهواك واحسن فاضحتني
يشكن ايامك خسارات وضياع
وانه چي حبيتك سنيني احسن رابحتني
جان من ضلعي خشبها بلام روحك
وعبرت حتى اليكرهك بيهن وماعبرتني
وشاغ گلبك
من سمع طاري الجرح وجفوفي ركضن صبرنه
وانت ياصاحب اجروحي
اللا عفتني ابجي جروحي ولا من صبرتني
مرة غازلتك جذب واتورطيت
والف مرة اتعذرت وما سامحتني
وتزعل وتاخذ عيوني وما اكلك
شوخذت كل شي لجن ما صالحتني
وصالحيتك وصاحبيتك
وانت انت
صاحبت شعري وابد ما صاحبتني
