الحلو داخو بية واختارو الي يبوسوه

كل حلو ينباس بس انته الوحيد

دخنه بيك وعدنه صارت هوسه

خدك يكهرب واليبوسه يطيح

گمنه من بعيد ناخذ بوسه

مسح تحديد للكل انه سويت

واسمك هم بقه تعداة تحديد

عده صوتك نشاز ابأذني أي صوت

وحته الصرخه منك جنهه تغريد

نعم غيرك اكو حلوين وهواي

لجن بس انته اصلي وهمه تقليد

ما اشتهي بيوم احجي ويه غيرك

ولا تشتهي عيوني لغيرك تشوف

تدري شكد لهفتي اعليك يفلان

ابكد ضيم العراق اعليك ملهوف

تسحك عالكلب صدكني ما اضوج

بس انه اعله مودك عايش بخوف

لان كلبي درب وجروحي عثرات

واخاف اطيح من تسحك بلا شوف

شكلك انه احبك والله غلطان

لان حته الاحبك ناقصه حروف

وصل حبي الك حد ماهو معقول

بحيث وياي انته وانه مشتاك

تشابكني وتشاقيني واشاقيك

واصيح الله واكبر بسك فراك

ملك امشي اعله طولي وانته وياي

ومن تبعد ادنك واخذ الراك

وبس انته عليك تشخص الناس

من كد ما حلوا من بعيد تنضالك

وصاير بوك بالحب هاي الايام

لذالك ما اعوفك خاف تنباك

واذا لا سامح الله بيوم باكوك

وداعاً يا ضحك مرحباً يبجاي

كبل لا اشوفك انه تولعت بيك

وكبل لا نلتقي سميتك هواي

ما افك باب كلبي شما يدكون

وافكلك باب كلبي وانته ما جاي

واجيت وعركه صارت بين العيون

عليك عيوني هاي اتصد كبل هاي

اذا غثيتني يصير الصبح ليل

واذا تضحكلي يشرد ليل دنياي

من تروح اصوم ويجي رمضان

من ترجع أأذن واشرب الماي

رووووووووووووووعة كلش حلوة
عاشت ايدج وردة
دوم الابداع
تحياتي

كولش حلو
عاشت ايدج ورده
دوم الابداع
تحياتي

يدللو منورين وربي
تحياتي الكم

كلش كلش حلو
شعر رائع جدا
عاشت الايادي
تحياتي

اكيد القصيده الروعه
لان كاتبها عبد الحسن الحلفي منبع الاحساس
تسلمين ورده ولا تحرمينه من جديدج

يسلمووووووووو
تحياتي

يدللو منورين
تحياتي الكم