شعجب مني تبريتي
جنت بلا كَلب لمن يجيني اليل
اجيلج وين ماصرتي وألبسج ثوب حنيتي
أجيلج والجفن عطشآن يشرب نوم
وأنتي اعله الدرب جمرات خليتي
تبريتي
يشمعه وحاركَه ثيابج نذر لليل
ولهسه دموعج اعله جفوف صينيتي
يمر طولج عليه وآنه نص الموت
وأظل أكتب قصايد فوكَ بيريتي
أنه الزارع سمارج عالسواتر شوكَ
حتى أثبت عراقيتي
وأنه الخليت دم دمع الشماته يطيح
جنت وياج .. أهز الدنيا من أمشي
وأخلي الناس كلهه تسولف بصيتي
تبريتي .. ونطرتج والمطر سجيل
ألف كعبة أنبنت بجفاج ..
وأهل الفيل أجوني وأنتي ظليتي
يصورة بشكل دمعه بخد جدار البيت
أحن للبيت .. جيه ريحة خيالج نايمه أبيتي
ولا جيتي
وأنه الحاسب شهر شهرين وتردين
هذا آخر عمر بالروح .. عشته ولسه ماجيتي
يهدن مفردات الشوكَ
وأكتبهن حلم وأزرعهن أعله الماي
ويخضرن عشكَ وتهيج حنيتي
سجنتيني ورضيت وكلتي ما مرخوص
مبارك بالكتابـــــــه انطيني حريتي ...!!
نطيتي لغيري فرصه يطير
حتى تموت حريتي
وامس بالطيف اجيتج ويه خيط النوم
وأباب الحلم ظليت
بس دريتي بيه بسرعه فزيتي
تبريتي
شعجب مني تبريتي
