السراب ( بين ابواب الرماد )
السراب ( بين ابواب الرماد ) للشاعر زياد البصراوي
صوتك يريد الصدگ وينك تعال
وشوف حته ديارك تجدي الصدگ
ونارك أباب الجمر طلگت رماد
وخلت احروفك عله شفاف الحرگ
انه اريدك تنسجم ويه الضروف
وترسم السيف اليشگ حلگ الدرگ
ال أيد بتروها التأشر للسراب
والبرد بچفوفي طارگهم طرگ
انسكرت سهامك بعد بيمن تصيد
وماتت اوتارك بعد بيمن تدگ
وفرصتك راحت بعد تتعب عليش ؟
ضيعتهه وهيه اجتلك للحلگ
وذبلت اوراق العشگ بأول نهار
وهسه جاي تريد اجيبلّك عشگ
خلگي شاعر باگوا گبالّه الحروف
بيمن اكتبلك بعد ما ظلّ خلّگ
ومات برگاب الورد ذاك العبير
وانطفت شمعاتة بحلوگ الضوة
وانت جاي وجايب النسمة اعله اديك
گلي من تموت تحتــاج الهوه .؟
أنت خدك نايم بسد الربيع
وانه خد الصيف من عندي انچوه
نخلتك ماتت كتلهه الكبرياء
وهسـه لازم ترجع تذل للنوة
طاحت خيامك على چتاف التراب
وانتَ باقي تدور اثار الوتد
وسجنوا گبالّك مئات المفردات
استهلكتهن زحمة تطرقهن بعد
.
.
.
تحياتي
