دنيا وتمشي بالمكلوب
دنيا وبيها ضاع الحك
أكول الصدك جذبوني
أجذب والأعم صدك
إذا تمشي بطريقك زين
تصل بحر الندم تغرك
وإذا تمشي بطريق أعوج
توصل بالسلامة وعالطلب تلحك
يكولون الشرف موجود
جاوينه الشريف اليحجي جلمة حك
ويكولون الشجاعة اهواي
جاوينه الشجاع اليحجي طك بطك
ويكولون الأمل موجود
د دليني اعله اعله شعرة وبيها اتعلك
إذا صار السواد أبيض
وإذا صار الصفار أزرك
أظلن أمشي عكس الناس
لأن أدري عكسهم حك
لون أزهك
أظل ابغك
واصيحن بالسما امعلك
أريد تجاوب ولتظل
تحجيلي ولتتلوك
أريدك ترفع بصوتك
ليهمك إذا واحد عليك بصوته ظل ينهك
وأريدك تصدك الجلمة
ولا تسكت إذا كامت غربان الحقد تنغك
أعرفنك غيور وأدري كلش زين
لأن كصته الغيور من الخجل تعرك
علمني الوكت ما أسكت اعله الضيم
واتلوك
وعلمني أشل جروح كلبي الكام يتشكك
وعلمني أكولن لا
لون كل الخلك صفك
وعلمني أنشف دمعتي بإيدي
ولا خلي بجمرها خدودي تتحرك
وعلمني الوكت حكمة
أضحي بروحي من أعشك
وعلمني أغوص اببحرك شماطال
لأن بحر الشماتة أغمك
وعلمني القناعة وأرضى بالمقسوم
وأحمدك يا إلهي ومنك أترزك
وعلمني أسولف للشعر همي
ولا ابينهه للشمات من أزهك
وعلمني ابين لوعتي بضحكة
وأكهكه وانه مجوي بنار
مايدرون أنه بكل ضحكة أريد أبغك
وعلمني أعيش الدنيا بالمكلوب
لأن غابة الحياة وبيها ضاع الحك
