ما مرتـــاح للشاعر الشعبي كاظم إسماعيل الكَاطع

ما مرتـــاح

للشاعر الشعبي كاظم إسماعيل الكَاطع

ما مرتاح .. ما مرتاح .. مامرتاح
عيوني تستحي بس الدموع إوكاح
ما مرتـــــــــاح
منٌك.. منٌي .. من الجاي من الراح
ما مرتــــــــاح
عركه ويه الزمن ورجعنه مكسورين
وبعيده المسافه وينـّـسي اللـّي طاح
ما مرتـــــــــــــاح
لأن شفت الشمس نزلت تبوس الكًاع
وبكف الطفل تنلاح
ولأن قاضي البلابل مدّد التوقيف
ومفتوحه السِما
والفيل عنده جناح
ما مرتـــــــــــــــاح
لأن قفل المحبه إنباك
وِترهـّــم عليه مفتاح
ما مرتــاح
متروك بجزيره وتيــّـــهت بالليل
وإجو ربعي عليّه بقافلة أشباح
وإنته إشبيك
لمّن دافعت عن نفسي صابك غيض
مو حتى الكنافذ من تحس بالخوف
تستخدم جلدها سلاح
ولا جنّ الفجر مثل الفجر محبوب
لون الفجر صاير يقبض الأرواح
ما مرتـاح من ربعي ولا مرتاح
تمساح إبنهرهم صاحو من الخوف
وجازفت بحياتي من سمعت إصياح
صارعت المنيّه وبيده هزني الموت
ومدمــّــى إطلعت
صفـّــكو للتمســــــــاح
كل هذا وتريد أرتاح
ما مرتـــــــــــــــاح
ما مرتاح من ربعي ولا مرتاح
نادوونـي.. وركضت إبليــل
إيد الرسن بيها وإيد بيها سلاح
عثرت مهرتي ... وربعي قبل ما طيــح
واحد كـــــال للثاني
أبشـــــرك طـــــاح
أبشــــــــرك طــــــــاح

عاشت ايدج عيوني
ع الشعر الجميل
تقبلي مروري وتحياتي

عاشت ايدج ورده
كلمات روعه
ننتظر جديد ابداعج

عاشت ايدج عيوني
كلام روعه
دومج مبدعه ورده
خالص تحياتي

يدللو منورين
تحياتي الكم