هلاوووووو
شونكم؟؟
اليوم اكتبلكم هذا الموضوع و اني كاعد بالشارع و حاط اللابتوب بحضني , و ساحب وايرليس من البرج القريب مال صاحبي ,, 5 مرات ردت انسحك و 7 مرات اشتبهو بيه طسة ,, و اجة واحد شايل جيس رمل و حصو و راد يبلطني ,, تالي اتأكد انه اني كائن حي فعافني و ادعبل كلش ليغاد ,,
اما ليش اني صفيت بالشارع ,, فلأن "بابا" ابوية طردني, كلش اطلع برة كلش فد مرة ,, اما ليش طردني فاليكم السالفة
فات بابا ,, ابو احمد لغرفتي ,, و لكاني لازم البلاي و دا العب طوبة 2000 الجهاز ريال مدريد و اني ماخذ نادي الكهرباء و خسران 411-صفر ,, و جنت مكيف عبالي اني 411 الى ان شفت لواعبي طلعو من الملعب و كامو يركضون حفاي لان اتخبلو من النتيجة ,, نتيجة مال 66 لعبة اني اختصرتها بلعبة وحدة ,, صارت سلة 2000 مو طوبة ,, المهم
اجةبابا جان يكلي ابني سوي shut down اريد احجي وياك
-باباهذا بلاي مو حاسبة ما يصيرلة شت داون
- لعد شلون اطفي ؟؟
دفرت البلاي و وراها شلته ركعته بالحايط انطفى
- هااا من هاي جايني كل اسبوع اتريد بلاي جديد ,, اي طبعا اذا مثل السرنجة حضرتك تستعملة مرة وحدة ,, المهم
ابني احمد انتة هسة كبرت و كرشك صار متر لي كدام و اريد ازوجك
- شنو تقصد بابا اني زوج؟
- لك ابني زوج شنو؟ لا اله الا الله ,, ازوجك يعني اشوفلك مرة ..
- دشوفلياها لعد بس البس المناظر
- اي ميخالف هسة البس المناظر مال الشمس و اشوفلكياها (ماخذني على كد عقلي)
- لا يابا مو مال الشمس ,, المناظر مالتك ,,
- ابني فضني ,, اريد افتهم انتة حاط مواصفات ببالك؟؟ لو اشوفلك وحدة اني على ذوقي ؟؟
- لا يابه اكو مواصفات ببالي خيالية ..
- اي يا الله ,, ابني سكوربي كام يحجي جديات ,, كول ابني كول
- اهم شي بالمواصفات ,,, اهم شي
- اي؟؟؟؟
- ما ماشية هواية ,, يعني 10000 ميخالف و سلايد و اريد اوتوماتيك بس وياها كلج و اهم شي وياها طوافة
- ولك طوافة شنو ؟؟؟؟
- ما ادري بس هية هيجي ,, هو انتة راح تخطبلي مرة لو مبردة؟؟
ابوية باوع عليه ,, بلع ريكة بصعوبة و خنزر عليه و دردم صار يشبه الدردومة,, ولو ما اعرف شنهيا ,, و
كلي
- زين ,, الظاهر راح اخطبلك مازدا مو مرة من هال مواصفات ,, احجيلي شعر عيون بياض سمار غير افتهم؟؟
- بابي ,, اريدها حولة
-حووووووولة؟؟؟؟؟؟؟؟
- اي حولة ,, حتى اكلها تعالي للحمام و انتظرها بالمطبخ ,, او هية ببيت اهلهامثلا اتكلي يلا وديني لأهلي ,, و بصراحة صادقت هواية ,بس ما شفت الحولة, شفت العيون الزرك و الصفر , اتصور حتى مرة صادقت وحدة عينها اليمنة صفرة و اليسرة خضرة ,, بحيث اخذوها شدوها ترفكلايت بساحة عنتر هسة ,, و شدو شرطي مرور بصفها بحبل سميك (سميك غانم) , وووو و و
ابوية باوعلي بنظرات تائهة (ما تندل) و حسيت بمقدمات الذبحة الصدرية راح تجيه
- وبابا,, بالنسبة للشعر اكو شعر كاريه اكو طويل يسحل وراها جنة ذيل مال تنين اكو ضفاير
بس اني عاجبتني الكرعة
- كرعة؟؟؟؟
- اي بابا كرعة , حتى يصيحولى رجل الركية ,, و كل ما اني ماشي طرررنك طاااا اكفخها على كرعيتها بحجة المداعبة و المزاح بين المتزوجين اتكوم هية بالبوكس على خشمي اتشيلي الجامللغ مال وجي اليمنة ,, الله ماكو هيج ,, و أوفر فلوش صامبو و شابون
- منو؟؟؟؟؟
- شامبو و صابون قصدي و ,,, و بالنسبة للون البشرة ,,
- اي ابني اتريدها بيضة وسط سمره؟؟
- صفرة ياحبذا
- صفرة؟؟؟؟؟؟؟؟؟
- اي صفرة و البسها كوستم أسود تطلع جنها موزة خايسة ,, الله اتخيل المنظر هي صفرة و اني ابيض يطلعون الجهال بيهم ابو صفار من الولادة ,, يموتون و اخلص من مصاريفهم وو , و ,,
- ولك كافي اتمسل خبلتني
- على كيفك ليش هال اتوتار انتةبابا و هيجي لعد لو بابانؤيل جان شسويت؟؟
- اتوتار منو؟؟
- ما أدري يمكن تتار احتمال؟؟
- لا يجوز كيتار مثلا؟؟
و ظلينا نص ساعة اني و ابوية نحاول نعرف الكلمة اللي اني كلتها و اخر شي اتفقنا انه ماكو هيج كلمة ,,
فجأة,,أبوية اتذكر الموضوع,, باوع عليه ,, و صاح بصوت وصل لدارفور يمكن
أأممممشششييييييي أأأأأططططلللعععععع ببببررررررةةةةةةة
و اني حاليا كاعد بالشارع و واحد عطف عليع ذبلي لفة فلافل و الشحن مالتي راح يخلص
اكول ,, هو ابوية شبي عصبي؟؟؟
هههههههههههه
تحيتي
