تريد تروح عني؟؟!بيا بخت؟يا دين؟
تتركني رماد بروح محتركه
اخذ ويّاك كلبي بدمعه والاحزان
حطه بجنطتك وبراحتك طبّكه
احسّن بيه تهستر مو كلب مجنون
يريد وياك يرحل والجلد شكه
احس عمري جكاره وبعدك انته النار
عاشرته بحناني ولهفة الشهكه
يا نسمة برد جتني بسموم الصيف
وبعزّ الجحيم وقمة الخنكه
لا ترحل ..تريد لوين وين تروح؟
محتاجك دفو و جفوف ادْيزركه
متلعثم لساني وخايفه الكلمات
اقسملك بعينك تكتل الحركه
يا قشة امل عشت العمر غركان
حرام عليك عمري ابعدك تغركه
صح اني جبل مبني بصبر وهموم
بس انهار كلي لكلمة الفركه
بعدك ما رحت واشتعلت النيران
بركان الالم لو رحت شيلحكه؟؟
الله وياك شحجي وحلك حزني دموع
واذا حلكه دمع شيسّكت بحلكه
لكن هم اعذره بكثر ما بيه ضيم
خل يجري بدموعه هالحزن حكه
باقي بانتظارك بيتي بابك صار
حالف من تجي كلي انكلب شبّكه
