عشكتك ذرة ذرة وصرت اغار عليك

الواحد فرد مايقبل التقسيم
بس انة انقسم وبدونك اتعدد

اتقسم بدونك وانجمع وياك
لان كلي وية كلك بيك يتوحد

جنت جاهل واجيك اتشرد من الناس
هسة اتعلمت من نفسي اتشرد

عشكتك ذرة ذرة وصرت اغار عليك
اذا محد يبوسك اذبح المحد

ولك لا تنطرح يم ناس تعبانين
موطولك حصار شلون تتمدد

وشعرك ليلة ظلمة توحشت عالريح
كل ماهب عليهةاتلفلفة ابسود

وفراشة نور اذنك والزلف خطار
مرة يحط عليهة ومرة يتبعد

وجفونك سمة ومجفي علة رمشك ليل
اذا ترمش يظل فرقد يطك فرقد
يل عينك بحيرة بكل هدوء الليل
ودموعك نوارس لو مشت عالخد

وعلى خدوك صور منقوشة من بوسات
اباوع عالصور مابايسك احد

وشفتينك شمس من تبتسم نصين
يقطعهة البرق وبنصهة يتجمد

وحنجك صدر بجعة انصاغت من النور
اذا ماتت شمس من نورك اتولد

ومثل زمزم ركبتك نص ذهب نص جام
وعين الماي هاي ال عالصدر تركد

يبو ايد الثلج لا تطلع بتموز
مو اخاف عالثلج خاف الخلك تبرد

واذا لا مو ثلج كل هالبياض منين
معقولة العظم فوك الثلج يصعد

يل جتفك منارة بيا شرع يادين
اموت من العطش وكبالك اتشهد

وحدر جتفك فرات ودجلة ملتقيات
وشفت شط العرب جوة الجتف ممتد

خطواتك حضارة وخصرك التاريخ
اذا تمشي العرب فوك الفرس تصعد

وعلي كل ماتمر يجبرني حسن البيك
اوصفنك لجن من وصفك اتردد

لذلك ماوصفتك واعتذر يهواي
وصفت الخيال المنك اتولد
.........

للشاعر نائل مظفر

رووووووووعة
كلش حلوووة
عاشت ايدج عالطرح عيوني
تحياتي الج

كولش حلووووووه
يسلموووو دموعه
دومج مبدعه
ودي

كلش كلش حلوووه
عاشت ايدج ورده
دوم الابداع والتميز
تقبلي مروري
تحياتي الج

تدللون ورود منورين

يسلموووووووو ياذوق
تحياتي

يسلموو ورده عل موضوع
عاشت الايادي عل كلمات الحلوه
تحياتي....

تدللون ورود منورين

تسلمين عيوني
دوم الابداع
تحياتي

تدللين وردة منورة