رهمتك عليه بس ما رهمت وياي
انت المــاردت شتريــد اسويلك
عــاشرتك من جـــان عمرك ليل
اذوب واشتعل حتى ابقى اضويلك
ومن طلعت شمس خط رجعه مـــاخليت
وما جازيتني لمن خلص ليــلك
امانة اسرار عمري وبيها ما اوصيك
يم شباك ذنبك صاحــن ادخيلك
وبكيفك بعد صون الامانة تخون
مـــا اكدر بعد اغــفــر واعديــلك
مـا بيــنك وبيــنك حيـــرتني ويــاك
مره ابجي على طبعك مره اغنيلك
جبتها وياك شعره وعاقل ومجنون
كل ساعة وتجرها وانا أرخيلك
شلي بهالتعب والعمر وشلة كاس
من كاس العمر جم دوب ابديلك
راح اصبر بدونك وأرهم بلياك
واذبح رمش عيني الجان يبجيلك
واتحمل عذابك والبعد والشوك
وما احط صورتك كدامي واشكيلك
وما اكولك نسيتك بس جرح بالروح
يكسر واهسي وما يقبل امشيلك
وجرحي الفاك صدره وما يريد خياط
واكف جنه واحد جاي يدعيلك
بس مجبور ادفنك يا عشك يا شوك
واقرة الفاتحة والوحشه اصليلك
وبعيوني الحزن يقرونه اليواسون
والفوك الحزن لو تدري شحجيلك
شماتي اجو واسوني ثالث يوم
حيل وياك كالوا مدري شد حيلك
وكالوا مو حلو الثوب الطويل عليك
واليكصر بعد شتظن يكـفيــلك ؟
اليـكـصر بعد لــتــظن يكفــيـلك..
