اهداء خاص الى نونه البزونه
:24
جور شما جرت بالروح تتحمل
حلو وطبع الحلو اعله الناس يدلل
ولو تطلب بحجه المحتاج
ما اردلك طلب موهوب ومحلل
يا نبع الحسن يالبيك شمره ريم
يترهدن غوه ومن ضله يتجفل
ويالخدود تلالي مرايه معرسين
يمكطوع الخصر يصغير يمدلل
ترف بالبطه ساكك تبهر العينين
يشع وبلا خجل مبروم ومحجل
يبو جفوف البرسيم يا شتل ريحان
يالطعمك عسل يهلال العيد واهل
ويالشفافك مصيبه الجوري منهه يغار
ويزعل عالنده ومن مستحاه يذبل
دخليني اعله بالك ولو مره وشوف
هلبت ينكسر خاطرك وتقبل
بلجي يهبن بروحك نسايم شوك
وبجلمه شلونك من تمر تسأل
يالمنكع بكلبي وكلبي ناكع بيك
لا صد عنك ولا من دللك مل
امك جابت يبيض غضب عالناس
يا هم يا قهر يا جرح ما ينشل
وازتني المحبه واشتهيتك موت
وهنياله اليموت بيك ويتعلعل
وهنياله اليلف روحه ويطولك كون
ومثل خيط الوشيعه بدوره المغزل
احد لعيونك وتلزمني رجفه خوف
وسبع موتات اموت الك وعدل
وهيم بحور عينك والرموش رماح
هندس والكحل من لونه اتكحل
وتيه بليل شعرك واطرب بممشاك
ويفضحني الشعر ويطولك اتغزل
ومن تكبل عليه . هروش كلبي تذوب
بعض تنهش بعض وعليك تتواكل
وتبعك مو بديه ابعتني ليك الشوك
ويردني المستحه من اتمايزك وخجل
ودور عالسوالف من اكرب ليك
يموتن عله شفايفي ولوني يتبدل
وحس بكلبي ليك يرف رفيق الطير
ومثل ابن السبيل وبيك يتوسل
وخلاني هواك ابحيره الوهواس
احظنك مشتهي وخايف ولك تزعل
وخاف يكتن دموعي اعله جتفك سيل
وتذوب رويحتك وموازنك تختل
وخافن ما يترف بجفوفي زيده دموع
وشيلمك بعد تبلني وتمشكل
تحياتي الج عيناي
:23
