؛؛جــربتــــــــك؛؛
امس جربتك وجربتك اليوم
اعلة طبعك باقي ابد ما شفت تغير
اجيتك محترك وبكل كتر نار
ونفط عالنار شفت اجفوفك ادير
ازرعت دربي بسامير وتنخيت بية
وجيتك ازحف عالبسامير
بيرك شح علية ومن ردت ماي
حفرت عيوني الك سويتهن بير
تعبت شكثر وياك وتمنيت
حالك حال هاي الوادم اتصير
اعرفنة جذب حجيك وداريك
واكلك صح جنت من غير تفكير
اخلاقك والمبادي طلعت اوهام
وطلع حجيك خرافات واساطير
كيانك يرتعش كدام الارقام
وضميرك يغفة من تحجي الدنانير
اتعض وتواضع ولا تبقة مغرور
ترة الدنية محطات ومشاوير
اذا بعينك الناس تشوفهة اصغار
عيون الناس هم تشوفك صغير
واذا عني انته تنشد اني معروف
بصبعهة علية الغانمة اتشير
رماد كبالي انته بهوية تنهار
شوداك اتحرش بالاعاصير
بدية اكدر افرغك واكدر امليك
لان زود السواجي من النواعير
كلشي يجوز صح بس انته غلطان
اذا اتضن الزواحف تكدر اطير
الحفر اسمة اعلة وجة الشمس نيشان
مو مثل الكتب اسمة بطباشير
