غفن نامن اجروحي وفززت ذكراك
على اجروحي بعد ما يرهم المرهم
الك چانت گبل لهفات من الگاك
هسه انه من اشوفك ابد ما اهتم
حلو تمشي اتغنج والشكل غراك
الليل شگد حلو و ينكره لو ظلّم
داريتك غصن حد ما كبرت ارعاك
ثمراتك علّن واليوصلك يحلم
عليمن جايني بيا جرح من ذكراك
تذكرني بجروح البيها تنزف دم
حاسبها لعب من ترجع اتلگاك
وارد ابني حلم يم حايط مهدم
يانهر اعله شفتي وما وصلت اشفاك
اثاريتك سراب بشفتي ململم
روح ابچي ندم رد دمعك الرداك
بس يمي بعد متهزني من تندم
اشد گلبي بحجر لو راد يتعناك
واربطه اعلا الصبر بالگوه لو صمّم
ضنيتك الي وبس انه من الگاك
تاخذني بحنانك ع الصدر انظم
اثاريتك مضيف تضيف المراك
وهوايه بمضيفك بالهوى تلملم
نهر چنت انه اضنك تكرم لينخاك
مو خدعة سراب اوصلك وتنطم
جرح گلبي ثلم والثلم ما ينحاك
رگعه يريدله شيحوكه المثلم
ومن طبت ونسيته جاي يترجاك
يگلبي الامر بيدك جاي يتظلم
رد يطلب الرحمه والقرار وياك
تريد انته ترده تريد بيه ترحم
