ماشايف مثل طولچ بعد ماشوف
واقنع عيني بيه وتقنع وترضه.
ونته اخيالچ أيغازلچ من تمشين
وبعضه ايلوم بعضه وياكل ابعضه.
كبلچ ماچنت شاعر غزل معروف
ولامو مادروا بيه الغزل امضه.
وشعري البيه رفض ويرددونه الناس
من خزرة عيونچ يستمد رفضه.
يلكلچ براءه ونور يعكس نور
واتشوفچ اعيون الناس المغمضه.
الشارع بيه صداع يصير من تمشين
وطوله يكوم يفتر يردم بعرضه
والمستشفى أذا من بابه اتمرين
عراضه لشوفتچ تتظاهر المرضه.
ابو الطيب يغض النظر چان يكول
بس يشوف طولچ فنه اذا غضه.
خط احمر جمالچ رسم فوك الكاع
وحضر تجوال خصرج وحده اليفرضه.
الفتنه الطائفيه من عيونچ الحلوات
عليهه احنه أختلفنه وبعد مانرضه
والامن مايستقر وتفرضه شرطه وجيش
بس بسلاح عينچ نكدر انفرضه.
والفوضى البالبلد مو من سياسين
الفوضى البالبلد من شعرج الفوضه.
كاغد ماي حدج والهوى يهزبي
ومن كد رقته بالهوى مايرضه.
حظه بيچ النده ابخدج طبع نيشان
چا شسوي بيچ أشفافي من تحضه.
وعصر النهضه داخوا بيه من شافوج
وانته الشايله بصدرج ألف نهضه
يلبفيچ سحر ليل الله طش الشوك
وانجومه اعله خدج صاغه فضه.
الحظ من يشوفچ صدفه بين الناس
يلزم بيده حظه ايطيح بحظه
الشمس حتى الشمس من تسد باب الليل
تنزل على شعرج حتى تتوضه
وغلط أحمد مطر من خلده التاريخ
لئن عن لون خدج ماكتب ومضه
قرضه من الشمع بالظلمه تطلب نور
وانتي النور منچ يطلب القرضه
ولئن تعكس بياضچ والبراءه البيچ
وحده المرايه تكوم تتشضه.
بالزي من اشوفچ انه اصيرن عين
وفض كلشي من اديه وحلكي مافضه.
مثل الضلل وراج اعيوني مصلوبات
ودرب الجامعه سويت بيه رضه.
وزير التربيه لازم يحط اشروط
والنظام الجامعه وعالمجلس ايعرضه
ويصدر قرار كله تعمل بي
وتنصاع العماده وتعمل بوضعه
طولچ من يمر يم باب الاستعلامات
عميد الجامعه يوكف صنم لحظه
وباب الجامعه من يمه من تمشين
مدير القسم لازم يركض ايكضه.
مو لجل العلم بالجامعه الطلاب
على مودج تره الطلاب مكتضه.
والمحاضر بالدرس مايحفظ الموضوع
لان ملتهي ابثغرج رايد ايحفظه
كراج الجامعه صنطه ويبچي العين
بس لمن تجينه ايصير بي ركضه.
وبالروضه خبر طش راح تتعينين
علمودج زلم سجلت بالروضه
