http://www.farfesh.com/article-images/b0713163808.jpg
اعدام حلم
آخذوك مني لان .. ما عندي شي يسعدك .. غير الدمع والألم
وانت ترف يا محب .. محتاج وردة فرح .. شتسوي بيه نعم!
محتاج عود أوتر .. يعزف جمالك لان .. شفاف بيك النغم
اتّصور اني الك .. واعرفهه تالي چذب .. ما ينفع ابچي ندم
سويت لاجلك بحر .. أتخاف منه السفن .. هسه لمضيعه بلم
شتريد مني انكتل .. بين الحزن انشتل .. والفرح مني انهزم
اذكر آنت قبل .. من اكتب آني آلك .. لازم أحقق حلم
تالي ذبحني الحلم .. سچينه عميه أومشه ... ويگلي تحلم وهم
ويگلي تكتب شعر .. وچذب على الورق .. تتكاون ويه القلم
ميفيد تبني قصر .. وانت اساسك رمل ... نسمة هوى ينهدم
تجمع وتطرح صفر . تضرب بكيفك بعد . والصفر ما ينقسم .
شفتك كتلهه العطش .. والماي ما ينشرب .. مخلوط ما ينفهم..
احجيلي عن واقعك .. لبست اهدوم العرس ..
وآنت بخيالك بعد .. تجمع اشواگ وتلم؟
اصبرلي بس يا حلم .. ليش انت تحكم علي ..
من دون كل البشر دائما حكمك ضلم
بحبال وصلي انشنق ... بشواكي ادفع ثمن .. وبابك اني انعدم
اگدر اسوي غلط .. واجرح اصول الاهل .. وانسه اني شاعر شهم
واكتل واهدد وحد .. سيفي بجروح البشر .. كلمن اقدره بحجم
وانكره واصبح وحش .. ويخاف مني الوكت .. ويه الجبل انصدم
العبوه من تنفجر .. صح هيه تقتل لچن .. ما يبقى منه ثلم..
مسكين عشت بحلم .. ضيعت نفسي بوطن ما عنده حتى علم
ما عنده حتى شعب . لا مبدأ ولا صدگ .
تحتله كل الدول .. كل دوله تاخذ قسم
ليش انت هيچي صرت .. مو چنت اعله جبل .. تتباهه بيك القمم
سويت روحك سهل .. يمشيك ياهو اليجي .. هسه انت حالك عدم
ولتگلي اني ضعت .. من ايدك الي جره .. والصار ما ينكتم
بأسرارك اني عشت .. واليوم كلشي اتضح .. مثل الگمر والنجم
وجروحي لزمن سره .. بالليل يهده جرح .. والثاني رد ينلچم
لتگلي اخيط الجرح .. كُلي اني انزف هجر .. شتخيط انت شتلم
ضيعني ليلك بعد ورجعت ادور الصبح ..
شفت العمر منتهي .. وامري طلع منحسم
عيش انت واشبع عسل .. لا تستحي من الخجل ..
گلي انتهينه وخلص .. قصتنه جانت فلم
واني الضحيه اعترف .. بس عندي مبدأ صدگ ..
ما بيع دين الوفه .. واسجد واعبد صنم .
