مما راق لــــــي
وأتمنى أن يعجبـــكم
~.~.~.~.~.~.~
بينه ... بينه
يازمان ايدور بينه
اوبينه ... بينه
جرح ماهاد ونفض نفسه الونينه
وبينه ... دمعة عين نشفها الصبر
شـــــوكَ الحنينـــــه
شكبنت عيني حلم رادت تسافر
وبطريج الليل ضل يعثر جفنها
وضاع اثرها
او ما درينه
الياااا مدينه
اتريد تنوي
وتزرع اطيوف العشكَ واترد علينه
او بينه ونـّـة روح .. ونـّـة روح
مفجوعه ابعمرها
اوبينه صرخه اتشابكَت ويه الجروح
وطرزت لوحه لطيفه
او بيها جمله
جمله حلوه اشكَد خفيفه
(( آآآه ياروحي الحزينه ))
وتاكل ايامي الليالي
اورحة اسنيني تدور ابين اديها
او تطحن ابروحي المحنّـه
ابكل هداوه
ابكل هداوه
ابكل هداوه
وانسحن بيها العمر زينه ويه شينه
او بينه ... بينه
يا زمان ايدور بينه
بينه عطشه .. او بينه غصّـه
اوبينه شاعر نامت ابروحه المنّـصه
وهـزّته اوزان القصيده
وشالت أيــده
والعواذل
نزّلت بالكـَـوه أيــده
لأن شاعر .. راد يكتب
صوره عن هاي البلاد
الباتت ابمحجر ظلم مثل الرهينه
اشكـَـد غميج الجرح بعيون اليتامى
اونزف دمعه ابحضن دمعه
وناحت ابفيـّه الحمامه
صدكَ طفلك يا عراق ايصير عامل ..
بأحلى عمــره ..؟؟
ويجمع ابجرحه القمامه
يا هظيمه
يا هظيمه
يا هظيمه
وابّـدل لزمة قلم
تلزم قواطي اثنين ادينه
نهـر دجله ايعاين النهـر الفرات
ايشوفه ساكت .. مدري مات
مدري معدومه ابوسط روحه الحياة
وما سمعنه ايموت .. حتى الماي
حتى الماي
حتى الماي
واتنوح اعله ريجانه السفينه
اوبينه ... بينه
يا زمان ايدور بينه
وشفت منظــر والده اتوادع ولدها
ابكل دمعها
ولبست اتراب الوطن شيلة ابريسم
وانزعت منها العبايه
اومو قصــد تهتك سترها
لن شريفه
ولأن مالف العلم صورة ابنها
لفته ابذيج العبايه
بيا صبـــر يــم الشهيد اتوادعينه
او بينه ... بينه
جرح ما بطّـل ونينه
