فصيدة للعرااق....للشاعر كاظم اسماعيل الكَاطع
بالغربه شفت التعب..
وتعلمت معناه.
وتعلمت عالسهر .. والسكته ..
والصفنات.
ذليت ذل النهر..
من ينكَطع مجراه.
واعرفت .. كلشي اعرفت ..
حتى النخل ينحني ..
لريح السفر .. من يجي ..
جايب غريب وياه .
الله ياهالوطن ..
شمسوي ..
بيه..
الله؟!!
نيرانه مثل الثلج ..
كلما تدكَـ عالضلع..
ابرد ..
واكَول:_ أشاه !!
الي امضيع ..
بسوكـَ الذهب ..
يلكَاه.
واللي مفاركـَ محب ..
يمكن سنة..
وينساه.
والطاح منه الكَلب ..
كَلب اصطناعي لكَه !!
ويشكلونه اهناه.
بس المضيع وطن..
وين الوطن يلكَاه ..؟!
آيا وطن ياخبز..
يلشارتك تكتل.
آ يا وطن ياطفل ..
هنيال من ضاع الك ..
نبض الكَلب ..
جنجل .
ياوطن زفة كَمر ..
ونجوم اله ..
اتهلهل.
عذبني ماعذبك ..
واكتلني مااكتلك ..
طبع اليحب ينكتل .
موش اليحب .. يكتل .
آيا وطن يانغم ..
صوت الحرب بيك ..
اجمل من غنه .. البلبل.
آيا وطن ياجذر..
والجذر هم بي طبع..
لو مات من العطش..
للوادي ماينزل.
علمني الفراكَـ ..
اعزف لحن غربتي ..
بقيثارة اشواكَـ .
واسهر واحن وانفعل
واتمنه ... واشتاكَـ ..
كل ساع اريد انكسر ..
مثل الكلاص .. البيد السكران!!!
ومثل الكَلاده البلدرب ..
بس اغفل .. انباكَـ..
علمني الفراكَـ ...
مامش مثل ديرتي ..
ولانلكَه مثل اعراكَنة عراكـَ .
جيتج يا كَاع الطيب ..
ياكَاع جيت بكَلب ..
مضروب زنجيل ..
خايف عليه انوب .. ينباكـَ
جيت اشمر قميصي عالنخل ..
ويصير الج طاكَ.
ولو تهجم سيوف الريح ..
لو نلكَه نخلنه امدبح ..
من الساكَـ .
مانبجي ونصدكـَ الصار..
ندري بكَاعنه كَلبين ..
كَلب يضم جذرته ..
وكَلب يحمي الساكَـ .
لو تهجم أسيوف الريح ..
نبقه بوجه كسرى انصيح ..
لامو انته بالتاريخ ..
مو انته البنيت الطاكَـ .
وسيوف الخشب ..
ماطيحت عصفور ..
بسيوف الخشب ..
تكَدر تطيح اعراكَـ ؟..
هذا عراكَََََََََََََََََََََََنا المهيوب ..
بي خيال ..
ثلثين الكَصب ..
يطلع وراه تفاكَـ .
ولو نمشي طول العمر ..
مانلكَه..
مثل اعراكَنا ...عرااااااااااااااااااكَـــــ
************************************************** *******************
تحياتي لكم
مجرمه
