حتى تعغفين أشقد أحبكي
كنت أزغيغ عاقل وحباب وغشيم ومسكين
وكانو اصدقائي يسموني مالك الحزين
أستحي معغف أحكي معالنسوان
غيغ بس بالأحلام
الله يرحم هذيك الأيام
كنتو أغوح من بيتنابالميدان الى بيت جدي أبو عمي البقال
بالأسبوع مرة
ومن أغشعتوكي بالسطوح عتنشغين الحواس
قام يغجف قلبي وكبت شعغاية جسمي
حبيتو جدي وعمي اكثغ وحتى مغت عمي النحسي
وقمت أغوح عندم بالسبوع ألف مرة
كنت معغف اشنو الحب
بس انتي عيونكي جذبتني
وأخلاقكي وتصرفاتكي عجبتني
وأمكي على امحبة امي حبتني
حسيتو الدني ضحكتلي
وأبوابا فتحتلي
ذبحتو نفسي بالشغل وصمدتولي كم فلس وغحتوخطبتوكي
ذاب قلبي وقلب أمي وأبوي عما قبل أبوكي
ضلت أمكي تشتهى وتأمر وتتطلب... مغمغوني ومغمغوكي
والله لو كن غادو لبن العصفوغ وكنوز سليمان
دنطيهم ولو بالذهب ثقلوكي
وأشقد جماعة حسدونا وغادوا يفرقونا ماطاقو
لأن انا بنص قلبي وعقلي حطيتوكي
بعجتو عين الكل وصغتو سبع وازوجتوكي
الله سهل علينا وخلصنا من القال والقيل
وارتحتو وريحتوكي
وعلى بيت اهلكي أشقد وديتوكي
وبغابات الموصل أشقد فتلتوكي
المحبي اببيناتنا صاغلنا تسع اسنين
ما قصرتو معاكي بشي وانتي هم ماتقصرين
ما خليتو اب نفسكي شي واشتغيتولكي
أش ما تشتهينو اتغيدين
وهسع على سالفة ازغيغي وبيهتي مني تتزعلين
واتغيدين على بيت أهلكي زعلاني اتغوحين
اشقد عقلكي ازغيغ وماتعغفين
دقعدي اب بيتكي يمزوجكي وأولادكي لا اتغوحين
ما ازوجك على غاسكي لاتنقهغين
كنت عدغيد اختبركي دغشع أشتعملين
حتى تعغفين أشقد أحبكي
حتى تعغفين...
قصيدة بالموصلي الفصيح...
تعتبر من الشعر الفصيح اتمنى عدم الحذف
للترجمة مريومه موجودي ^_*
