سجل حضورك بأبوذية

غرك قلبي ابحر حبك والك فاج
والك فتحه بوسط قلبي والك فج
الك شرطة حرس تطلع والك فوج
والك قاسم عطا ياخذ تحية

لفيت السلف بيدي ولا لف
وكلتله فوت منانه ولا لاف
فديت العشرة والخمسة والالاف
وفديت الربع وحتى الخمسميه

عيوني لا دمع بيهة ولا نور
وبعدك لا شمس تنفع ولا نور
مهند ما عشك مثلي ولا نور
ولا يحيى حمل مثلي اذيه

اريد اكصد لعد كلبك وظيفه
واحط حبي على حبك وظييفه
اذا هذا العشك صاير وظيفه
ما اطلع تقاعد للمنيه

كلب صافي لون تهوه كلبنه
وابد مايوم عالصاحب كلبنه
احنه ضلوع الك وانت كلبنه
ونحافظ على الكلب من كل اذيه

عليك اسال هبوب الريح لوهب
وعليك الكلب كالمجنون لوهب
جمر فركاك وسط الروح لاهب
ويطفه بنظره من عينك عليه

ليش انته الشماتة بس تجرحك
عدلة ادفنهة روحي بس تجرحك
من كد ما احبك بست جرحك
وتمنيتة يظل للموت بيه

زماني ماعرفتة شراد ماراد
بنكباتة لعد جلاي ماراد
الاحبة ليش اصيح عليه مارد
هدم حيلي بسكوته وعم علية

تسودن كلبي بحبك وجن بي
والف عفريت صارن وجن بي
تذكر من نمت صفي وجن بي
احس بجنه نايم مو عالوطية

حبيبي شلون حالك وصفه اليه
عوف الناس كلهه وصفه اليه
مريض وصرت انت وصفه اليه
من اشوفك كل مرض مايبقه بيه