لمحبي الشعر الشعبي

السلام عليكم

هنا تحت هذا العنوان سانقل لكم اجمل قصائد في الشعر الشعبي
العراقي و الشعر النبطي (في وقت لاحق )
وسابدا بقصيده رائعه لعريان السيد خلف

بَعـَدْ لَتْظِنْ

بَعـَـدْ لـَتـْظِنْ
تحايلني المودّه وليك روحي إتحـِنْ
و بَعـَـدْ لـَتـْظِنْ
تكـَـــاوي امشتتاتي
وبيك بس أصفـِنْ

وأبـَـد لـَتْظـِن
يضوكَ الدمع عيني
ويطفح المجمن
مالازم فرح
كون اليحب مذلول!!
وبشوفة عيونك عاليحبها إتـْمِنْ
انا ابروحي اليتم من لحظة الميلاد
وشيكلف اليتيم الحزن من يحزِن ؟

سكـَـتني أوٌل محَبـٌـه
الكاس تلو الكاس
مُر.. وتفنـّنت بتكــَلوجي اتفنن
ونِتْ
ما قصرت... يابخت هاي الروح
ابسكـَــاي المر.. ترف مترهدن اترهدن
ونه امباري ويه طولك خاف من لاخاف
تدفه ابلهبتي
وآنه اطكَ سن ابسن
ومذاير .. حمامه وذ يّراها الباز
ومذيّر الباز .. ابيا كتر يَمـّن؟
كـفت لاملامه .. ولا ضحج شمـّات
ولاكـَال وكـَلت.. وازماط ..وتمسكن
اهي كـَطعة نفس لو رفسة الذبوح
والمذبوح
رفســه ومن بعد يسكـــــــن

السلام عليكم

وهنا قصيده مظفر النواب

فاركًيـتْ إنتـه السفيـنَه وآنه جايبلـَك بحــرْ
خِفِـتْ !! مايكفيـك عشكَ الناس
توصــلْ فرح كَلبــكْ ..
كَـٌعديتْ الثلج من نومــه الثجـــــــيلْ
وسلسَـلتـْلـَكْ حزن كَلبي سلسَبيــــــلْ

جـِبتْ سلطــان الحلمْ ...
شِفتـَكْ مِثــل ممسـوح بغياب الشمس
فاركَت حِلم النـاس ومَلـٌيتء السفينه والسفَرْ
إشلـونْ كَلــبك طاوعـَــكْ
ماتكَفْ عالجيــــــــــــدوم
وَجـهَكْ كَمـَرْ ونجـــــــــوم
تنطيــنه كل لحظـه إتجــاه الريـــــــح
نِشتـــــاكَ الكَمـــــَـر
يصعَدْ حِسـِنْ وجهـــك كَمــَر

مابجيــــتك ..... ما بجيـــــــتكْ
آنه بجـٌتني السفيــنه
إمنين ماطـكَ الرذاذ إتفكْ كَلبها إتريد تبحـِـــر
تِدري نـوباتْ السفن لو ضاكَ خاطرها
إبجُبـُنْ سفـٌانها إتســورب وحدها ؟ ؟
تدري نـوباتْ المحبـٌـه
إتمـِلْ طبُـع محبوبـها
ويغفــه عالجتــاف الســــــهر ؟؟

مابجيــــتك ..... ما بجيـــــــتكْ
مَدري منهو إبصدري يبجـــي ؟؟
مدري منهو إيشَكَـٌــكَ إبكَلبي كواغِــــد ؟
مدري منهوْ إيريـــدْ يرحـَـلْ ؟
مدري منهو إيجرني بيدَر للمطـــــــر ؟
مابـِجـيتـَكْ .. درت عيني للبَحــَـر!!
أبجي المســافات الهِمتها ويـــاك !!
مابجيــــتك ..... ما بجيـــــــتكْ
إنتـه تكذب مابجيـــــتكْ
آنه هدٌيـت السفيـنه
وسيـٌسـتها إشراع أسَـبكَ الريــح
ولا خاروعـه عندك للمطــــــــَـــــرْ
..... ما بجيـــــــتكْ
آنه جايبــلـَكْ من دموعـي بحـَــــــــرْ

السلام عليكم

كاظم اسماعيل الكاطع

حب جديد

حُبْ جديــد

* * *

إنتِ

إنت حـرٌكتي البحرْ منْ بـَعَد سـكته

وإنتي

حـَلـٌيتي السؤالء الماعرفـته

وإنتي خـَلـٌيتي النجم

بعيوني يلتم

والنجم مو هينـَـه لمتـَـه

إنتي رجـٌعتي النِفـَسْ

لِسنيــنْ ميتــَـه

وإنتي خـَلٌيتي الغصنْ

بالروح يثمرْ

كَــبلْ وكتــــه

وإنتي رجـٌعتي الحنينْ

البالصغر عند أمي شفتــه

إنتي ربحي وعَوٌضتْ كلما خسرتـه

ياجميـله بكل غصن

وجهج رِسمتـــــه


وجه ورده

والنـِده إيغازلها جبتـــه

جـِيتْ أشوفج والكَمـر

ويــاي جبتـــــــه

ويوم شافج أحله منــٌه

كَـاليٌ خـَلـٌيها سكتــــه



إنتـي ربحي وعَوٌضتْ كلما خسـرته

وانتي حَلـٌيتي السؤال الماعرفتـه

وإنتي رجـٌعتي الحَنيـن

إل بالزغـُر عند أمي شفتـَــه

السلام عليكم

محمد جواد الدخيلي
اوتار الصبر

مشيت بغربتي وحدي
ومشه وّياي بس خوفي
أوحديت أبليل وحدي
أوصادفتني إهموم
بس مــا دوهنـتـّني
أوذلّــن أجفوفي
أوثكـَـل بيّـه الحزن
ما صحت منـّـه إدخيل
لا طـّيح دمعتي ولا سلب شوفي
فز شيطان شعري
وفززاني أوياه
ردت أكتــب قصيده
أوضاعت إحروفي
هدل حيلي غفل
والكـَـاع بـيـّه تروط
وعلى أوتار الصبر غنيت معزوفي
أخيط الجرح كـًـــوه
أوتنفتــك جرحين
أروف أجروح قلبي او مانفع روفي
إنزعت ثوب الصبر..!!!
بس ألبسـت ثوبين..!!
ثوب اسمه الضمير
او ثوب معروفي
أختبص قلبي..
او ندهني وهاج بـيّه الغيض
طكً فيض الزماط
أوهـّدم اجروفي
ماهمني الحجي
اولا دنكـًـت للكـًــاع
وسيوف العده
ماثلمت

وهذه قصيده بغداد للشاعر مشير السعدي
عَروسَه إبلا مَهَر لِلذ َبـِح زفوها
إوياريت إلذِبَح گصاب
عَكِس ذ َبح الخـَلـَگ حلوتنا ذِبحوها
صُبحَتها دَمِع ومحَنيَه إديها إدموم
إوبَدلـَتها نـَخل گنطار والگنطار مايلاح راسه
إعروگه حَشوها

عَروسَتنا مُـهُر لوگـَب تِغـَني الگاع
رِكبوها جـِسِر مِن خـَنيَب إلمعبار إولِلناعور
بالصَيهود سِرجوها
عَروسَتنا گِصيبَه إمحَليَه إلحديثات
غاروا مِن سِحِرها إمكعكِلين إلروس إومِثِل ريش
إلخضيري نـَتِف نِتفوها
عَروسَتنا نـَهـَر مِن فيضَه بينا الزود
شِربوها رَشَن بالگيض بـِشتـَه إبلا وَرَع
بالفيض بَزوهــــــــــا
عَروسَتنا ثـَدي بـِضلوع إلمحِبات
لـَبأ زاچي إبصِباهم رضعَوا الظرعين وأتلاها
إبصَدرها الفاله هِشلوها
عَروسَتنا حِظِن لولـَتنـَه وإحنه إزغار
إوبارتنا زِلِم وإبين إديها إرغيف مِن گـَصَر
خبزها الزلم عضــّوهــا
عَروسَتنا دَمِع بجفون إلمعَرسات
مِن يـِنزِل فـَرَح يغتاضَن الرمشين أنانيَه
إبعِرِسها غـَصُب بَچوها
عَروسَتنا كِحِل بـِعيون إلبنـَيات
مِن تِبچي كِحِلها إويَ الدِموع إيسيل سادِيَه إو
أبالس دَغـَش كَحلوها
عَروسَتنا حَديقـَه إمزوگـَه إلولايات
كَلـَوا طـَيـِب ثـَمَرها إلتين وإلزيتون من جَفـَت
حِسَچ سِعدان زِرعوها
عَروسَتنا عَرَگ بـِجباه إليتعبون
إتوَسموها شَرَف يوم إلنِفاهه إوزود إومِن حَل إلوِفـَه
هالعِرگـَه زاحوها
عَروسَتنا تفـَگ هَلهَل فِشَگها إلماو
سِرگيها إنتـَخـَه إوحَط مِشطـَه بالترباس إوچيلات
إلمشط بالحجرَه حِبسوها
عَروسَتنا إمام إويوجع إلشارات
صَلـَوا بيه جَمِع مصباح جمعَه إوعيد وإلخـَمسَه
قـَصُر بالعِتبَه صَلـَوها
عَروسَتنا شَرِع رمضانـَه خـَمس إفروض
بالدَك وِإلدَكر أدَوا ثـَلاثـَه إونيف وإلباجي إلبُگة وي
ذيچ صاموها
عَروسَتنا نِذِر نِذروها لِلشيطان
إغتِصَبها أبليس كبل إلزَفـَه تالي إلليل مِن
صِرخـَت شَرَف بالشَرَف حِرگوها
إهي دار السلام إوكَعبَة الغازين
إهي بَغداد إلعَظيمَه إلمالِواها الكون أبصَلاة الله
إعلى طه إوياي حَيوها

السلام عليكم

ومطفر النواب ثانيا

جـَـرس عطلـــه
مالـَه أحـٌد شغـُل بيـــه.. جـرس عطلــه
حيل أدكَ نوبــات وحدي !!
أبجي وحدي .. أحجي وحدي
آخذ المدرسه عُرض إبطـــول وحدي
أطفه وحدي بلايــه أحـٌد وأشتعــــــــل

جرس منـٌي وبيـٌه وحدي أشتـُغـُـــــل

كَِلتْ أكَضي الظلـٌنْ إمن أيامي

أتفرٌج
إمنْ الشبــاج عالدنيه وهـــلها
ولـَنْ بالشبيبيــج الكَبــالي إتِلـَجـلـَجْ
كَـامـَه من بَلـوٌر

شِكلـَتني إمنْ عيـــوني شَـــــــكِلْ!!

غـَمٌضيتْ إبربع جـَفـٌي

وبثلثْ تربــاع شفت الدنيـه مزروعه كُــفُر

مشمش حــلو ..

ورمـــان ...
وفـَــر بيـه الخِصِر فرٌة حِـجـِـــــــلْ !!
صِحِتْ سبحــانـَك شـَكَلـٌكْ ؟ ؟
كُفــُر .. وجَنـٌه .. وشِتا
وصـيف .. وربيــع
!! إبجَسَد واحد
مِنْ سمَعني المشــط من إبعـيد
إتمَركَص إتمُركَص عالهَوه
وعـضـٌــــاني ..
بسْ عضــٌـة طفــــــل
عَـضْ بعـَد .. عَـض بعد
يابـَعَد روحي
تلفـَنتْ للجنـٌه من شبـٌاجـَك الجدٌام بيتي
وبالغَلَط فـَرٌيت رقم النار بيـــٌه

فـُر بعـَــد .. فـُر بعَــــد
بس فـُر عـَدِلْ
مالــَه أحـٌدء شـغُلْ بيــٌه
جرس عطلـَة صيف ومتـاني المدارس

أدِكَ وحدي بلـكن إيكَطعـَنْ العطله
ويشتِهـَن دكَــاتْ كَلبــي
كِل كَصـيبه إتكَلٌك آنه
وكل خصِر محبــَس عرس ويكَـٌلـٌك إلبَسْ
وإنتـه نازع نفســَك إمن إزمـان

وتلملم سَكتـٌكْ
جيت للدنيه نــزِلْ .. ومسافر ألله ويـاك
للسلطه نـــزِلْ
ياجـَرس يالعِشتْ وحدَك
ساكت إمن أيــام ماواحد يسمعَكْ
تعَـــبْ ؟ ؟ لو مَلـٌيـتْ
لو رنـٌاتك الحلوات
ماعادَنْ بنات التكي والزعرور يلتَمـٌن عليــها
ياحســافه ياجـــرس
كل ســاع رنـٌاتك عرس
بس الوكت كلـٌشْ نحس
كلـٌشْ نحــــــِسْ

السلام عليكم

وللشاعر كمال حمود السعدون

من اجمل ما سمعت

خلها سكته

خـَلهــا .. سكتــــــه
حتـٌى لايسمع عدوٌك واليلوم وتِصفـَه نكتــــه

خـَلهــا .. سكتــــــه
سوله بيك اتكًــول كل مامر عليك وتحجي كلشي اللي عرفته..
خـَلهــا .. سكتــــــه
قلبك ابيض مثل قطرات النده او للماعرف لون القلوب ابساع بعته
ونيتك نية نبي او حجيك صدك للجذبوا كل السوالف رحت كًـلته
انته بأيام العسر ماي الوجه مايوم بعته هسه متكًـلي شجاك ...
وكًـتك الما نصح مره اتظنه غير كل موازينه وعشرته
خـَلهــا .. سكتــــــه
خلهه عالمامش تمر اسنينك اليكًــضن قهر
لنهم ا يكًـولون كًــبلك كلمن او حظه او قسمته

خـَلهــا .. سكتــــــه
عفيه وا دم .. عفيه خلكًـك ما جزع لمن جزعته
عفيه روحك تحمل الصبر الصبرته. جم جرح ضمدته بيدك
جم قصيده التكتب او قلمك وريدك
وجم صديج اعله الدغش حط ايده بيدك
وانت ذاك انت التبيع الطيب مارَدٌكْ حـَجي
ولا جذبت جلمات عدوانك نشيدك
لا تظنهم غربه ذوله الذمـّو الناس اعله غفله
ولاتظن واحد يجيك ابشده ويفارك فرحته
وهذا طبع الناس كلمن يجمع النار الخبزته
وانت موش اول حزين ايموت والضحكه اعلى شفته
خلهه سكته... خلهه سكته... خلهه سكته

هويتج للشاعر عبدالامير الناشئ

هويت وصورتج للموت تجري ابـدم شراييني
وتكًـلي انت صدك حلمان ويه الحلم خليني
وتكًـلي انت صدك مجروح بين الجرح خفيني
لا.. ظلي اعلى حلم الشوك .. ظلي ولا تذكريني
اوحياتج والعشك والموت ما بياش يا عيني
حفر وجهي العذاب او جيت خافن ما تعرفيني
آنه العود البكًـه بلا ماي بس للشمس ثاريني
وآنه الليل وضواي ادموع من سدو روازيني
وآنه الموكًـد خفت ظليت من هفتت جوانيني
وآنه الرب البكًـيت وحيد من شكًـوا قرائيني
وآنه الباكًـو عشرتي وكفروا ابديني
وآنه اشما كًـلتي وشتردين سميني
سميني سهر ودموع. سميني قهر وجروح والمالوم سميني
آنه السدوا نهرهم عن بساتيني
وآنه الحلبوا مطرهم خاف يرويني
وآنه الحاكم وبالتعذيب حكمتني قوانيني
ادواي اجروح غيري ومن يداويني
عمر ظليت بس اليال جا ياهو اليضـّويني
وبكًـت روحي تحن وتذوب مثل الشمع شوفيني
دخليج متت حفنه سنين ما عايز تموتيني
دخليج صخر كًـاع الروح يبست مايتي ابطيني
تعجزين اشتزرعيني؟ تملين اشتنثريني ؟
ورد؟ وشلون يـّخضر لوح وانه الماي ناسيني
على جرحي اليون بسكوت خليني
واظل اهواج كلما اضيع ضي حبج يدليني... يدليني

السلام عليكم

وللشاعر مشير السعيدي

سَلـَمتـَك حياتي إستـَسلـَمِت بـِهواك
إوحَرَثت إلروح لوح إتفِيَك أشجــاره
إوشَگيت إلسِواجي إهروش روحي أنهار
سِمچَه إلروح صارت وإنتـَه سَحـاره
بادَلتَك حنان إوبادَلِتني إلشوگ
صَم چكليت حُبنا إشمَحلى طِشاره
طاش إلعِشِگ مِنـَه إوصار بيه مَزيون
وإلعِشاگ كِتبَت شِعر بأخباره
مو كِلمَن يِحِب گال آنا هَم حبيت
مايِشبَه نِثيث إلصيف مِزنَة رَعَد مَطاره
حبيبي إن مايِمُرني إيمُرني لَحظَه إبطيف
بَس إن غاب لَحظَه إسنين مِشواره
مِن يِزعَل حبيبي إبساع يِرضَه إوياي
يدري أطيه عمري إلزَعلَه كُفـاره
إوبَعد يِدري حبيبي إمن أزعَل أرضَه إوياه
إيدَغدِغ مِن يِسولف ناعِم إحواره
إلوادِم بالزَعَل تِتكَور إلشينات
ولفي إيشيل شوگ إوطيب بِكـواره
وِإن يِبعِد حبيبي إشما بَعَد مِرتاح
ساكِن وسط گَلبَه إوگَلبي خِطاره
حبيبي إعيونِه دَفتَر لوخِزِرتَه أقراه
بِعيونَه حبيبي إتبين أسـراره
هاي أطباع وِلفي وأرد أوصفَه إنوب
شَشرَح شَرد أوصف تِهبِل أطواره
مِن يِمشي حبيبي إتگول چَنَه إثنين
عازِل طولَه خِصرَه إونَگلِتَه أشباره
إولو حَل إلجِعِد خاچيَه على إلمتنين
شَمس إلگيض موجَة شَعرَه فَواره
لِگاح إلنَخَل طِليع عِندَه إسنون
مِن يِضحَك بَحَر مِن فوچ عَباره
رِگبتَه إتلِج بياض إوتِلمَع إمن إبعيد
سَراب إبصَحرَه قَحلَه إلرگبَه مَـواره
چفوفَه إتگول نِمرِش بين إيدَيَه إتذوب
وِإلبَرحي إستَحَه إشما نِصَع جُماره
بيَه آنا إلحبيبي إشما وِصَفتَه إعدول
كِل وَصفي شَذر ماصار بِسواره
بَس بيَه إلحَبيبي شوگ ماموصوف
قوافي إلي وِصَفني إبوصفي مِحتاره
بيَه أطباع شاعر مِن يِحِب إيهيم
إبكِل وادي يِدَوِر نَكهَه لَشعاره

السلام عليكم

كاظم اسماعيل الكاطع

مُرَه مُرَه
مُره مُرَه عِشرتي وياك مُرَه
ومن أريد أنساك يمنعني الكًلب
ويذبله حســـــره
ومن أريد أنساك , يعرضلي الدرب
ويكًلي إلك خطوات
ذكـــرى
ومن أريد أنساك تذكرني الملامه
وشنهي ربحي وياك
واللي مادروا كًالو
تخســــره
آنه شنهي الماخسرته وحتُى أخسره ؟
ويانهر يعتب عليٌه ... ؟؟
حتى بجناح الكًصب روجات أعبره ..
وياجبل يصعب عليك حتى أذب حبال روحي
إكًصايب أعلى جتاف صخره
وياعظم تتصوٌره إلتمْ !!
حتٌى يم بابك عشر كسرات
أكســـــره
مُرَه .. مُره
والمراره إتزيد لليمشي إبجزيره
ومالكًه وسادة محبه إتريح
ظهـــــــره
والمراره إتزيد للمايلكًه ظِلْ
وينتجي إعله الشيب عُمرَه!!
ويا جمرتي الماطفَتْ
حَسٌبت يطفيها دمعي
ثاري دمعاتي إعله خد النار شذره!!
إنته من دكًيت بابي
جبت وياك الحزن خطار ماين
والفرح طلٌعته برٌه!!
آنه من شكًيت زيجي إحتركَت إيدي
وانته من شكًيت زيجك شفنه كًمره...
كان عمري نهر صافي
ومايه غافي
وخنجرك مثل البلم بالليل طرٌه !!
ويانهر والحسره حسره
كون أشوفن سندبادك
شايل إعله إجتافه جزره
بكًلبي حسره...
كون أذب ثوب الحزن وآنه بشبابي
والحزن عالخد أســـطره..
هيٌه حسره وأمنيه\ نسميها فكره
كون أشوفن سندبادك
شايل إعله أكتافه جُــــزْرَه
كون أشوفن مريمَك ما بيها لولـه
ومن صِدِك نلكًاها عَــذرَه !!
هيــٌه حسره .. وعشره مُـرٌه
والمراره إتزيــد للمايلكًه فـَـيْ
وينتجي إعله الشيب عمـره

السلام عليكم

دافيــــــه

* * *

دافيه مثل البحيره


وحارٌه مثل الرصاص


هيج أعرفج .. دنيا مابيها سكون


عيون لبوه وصوت كـــاس

هيج أعرفج سجن وردي

ومنفى ما منــٌه خلاص

دنيا مابيها سكون

مثل خلخال إبدويــــٌه

والإبل تركَص على صوت الأجراس

ومن كثر مابيج لهفه

وعافيه



ولذ ٌه وحمـــــاس

ما أشوفج يمي وحده

صرت أشوفج يمي نــــاس

دافيه مثل البحيره وحارٌه مثل الرصاص

إشغيرج واليوم صرتي

بارده مثل النحـــــاس

السلام عليكم
محمد جواد الدخيلي


شوكِت ياقلب
من ظيم الوكت تبرد
اعله بختك ياقلب فضني
دكافي الجرح عالسجين يتمدد
كافي انعاشر الجّله او ظلام الليل..!!
وخيوط الشمس بجفاك تتفرهد
كافي اللوم...
صعبة احجاية العذال
إمن اهل لله وعلينه الناس تتمزهد
كافي انزم حجيــنه.. ونظل محتارين
من ينشدنه واحد ما نعرف الرد
يا عسر الليالي المرن إعله أيوب
غفلة أوحزن روحي البيهن اتجدد
ياباب السكَـم..
خايب ولك دنسـّـد
اذا راح الوفه
او ساموا جرحنه بآه
أذن مامش دوه .. ايخلي الجرح ينشـد
ولا طيب حليب..
البلضنك ينعد
وخلص رمضان
واحنه بلا صبر..
ونعاين اعله العيد
أجانـه العيد..!!!
لاجن من اجانة العيد يمعود
من دم دمعته تسيل
والوجنات ليل أسود

السلام عليكم

الشاعر شاكر حنون

وايـــدك
وايدك خليهـّه الجوامن بسمرت توهه الجروح
وايدك خليني اوجد ما هي روحي بلايه روح
وين متشلبي الرواسي وسحولتني على السفوح
ماني خزن جرح قلبي منك وانت يمهيـّل تفوح
جان عندي ذراع حد الشوف من يمتد يلوح
قسمتي من الله لكًــمتي توصل الحلكًـي وتروح
وايدك .. يالشيبتني وانه موش اولام شيب
يالغفيت بقلب قلبي ..وصرت وسط القلب عيب
انت كل الداي منك وانت لي احسن طبيب
شنهي معناها الحياة بلاايه ما تشبك حبيب
وشنهو معناة الحبيب الما يضل منك جريب
وشلك بشلعان قلبي كون حبك لا يودي ولا يجيب
انت ضيعت البديه وغاب عني الما يغيب
ليش ضحكت الغراب وبدليته بنوح شدو العندليب
اضحك.... اضحك يازمان
تعلمت تضحك لون تسمع نحيب
والله ما سمعك بواجي...
يلي طبعك طبع حيــّه سكته من تلــّدغ تغيب

السلام عليكم
وهذه قصيده ليل المحطه
كاظم اسماعيل


* * *


بانتظارك خلٌصت عمري إنتظار

عاشرت ليل المحطه

وارتجي إيجيبك قطار

والقطار !!لو يحب مثلي .

. وتشب بضلوعه نار

يسرع إبمشيه ويجيبك

بالفجر قبل النهـــــــار

ولَو تعٌبني إنتظارك !!شارك العمر إبسنينـــه

إهواي كًالو مايجيك !!وكًلبي جاوبهم يجينه .. يجينــه

ناشدت كل روجه عنٌك

؟؟كل جرف كحَلت عينـــــه

وإسألت كل الشواطي ؟؟

بلكت إتجيبك سفينـــــه

!!!! ولا سفينه ... ولا قطــــار

وخَلصٌتْ عمري إنتظــــــار !!




لا قطار ولا سفينـــــــه

وآنه والليل إبأمل جَيْتَكْ علينــــه

طيح يا دمع النده وكًطٌر بِدِينــه

إحنه ليليٌه إنتلاكًه

نسهر آنه وياك ياليل المدينــــــه

آنه عيني عالمحطه

وإنته عينك عالنهار

خلصٌت عمري إنتظـــــــار

وهذه قصيده اخرى


* * *

ملفته للإنتباه

* * *

مثل شبوي المسه بعطره وشذاه

حبـٌه.. حبـٌه وكَطره .. كَطره

وبالرسم طوٌل خلكَ بيــج الإلــه

صوٌر عيونج مواني

وبيها عاف الليل نومه وذب غطــاه

من بعيد إنتي جميله !!

من قريب إنتي جميله !!

واكَفه .. تمشين حلوه

والحلو وجهه يبيٌن من كَفــاه


عيوني ما تكذب عليــٌه

العسل يم الإشاره

جدٌى منـٌج .. كِسَر كَلبج

وأخذ من خدٌج حــــلاه

الله .. الله إشهل حلاه



الشكر ماكان مزروع إعله كَـــاع

أرض خصبه للشكر هاي الشفاه

والكَلب مدري شجـــــاه

قبل كنت أكَدر عليـــــه

ألوي إذانه إيخاف منــــٌي

وهســٌه صرت أمشي وراه

وهســٌه صرت أمشي وراه

ولا حيــاء في الحب
_ أحبج _

خل يحسبوني رجل حن إلصِــباه

لأن ملفته للإنتبــاه

سنه إشفافج عله إشفافي

بصراحه الوكت موكافي

أريد الشته إيصير أربع مواسم

ياحضن دافي

وأريد الليل سبع إسنيـــن

والله إيمــَوٌت الغافي

لو طال السفر ويـــاج

من روحي الخدر ينزل عله الرجلين

وأمشي إعله الجمر حافي

ولو ميت وأمر بشارع إمشينــاه

أنسه جنازتي وتتحرك أطــرافي

.. ولو يطفه الضوه من الصبح لليــل

:- عن بيتي تِكَـــول الناس

عنده إكًلــوب ما طــافي

ضـَعٌفني الزمن لكن أكابر بيــج

من صار النهر دهله إبربيع الفات

مَدٌيــتي إديــج ورد نبع صـافي

سنه إشفافج عله إشفافــي

بصراحه الوكت مو كــافي

السلام عليكم
وللسيدعريان السيد خلف

كـَِــنطاري

* * *

زنجر قفل روحي..
وحاير ابناري
ومن كَـــلبي اعله كـَلبي
انكـَـطعت اخباري
ذِكـَرْتك...
ياعشر تيام تفاحات
عشره ابكل حياتي
وصارن اسراري
جم ليله اعله ليله
ايعز علـّيه النوم
بس حلمك توالي الليل خطـّاري
وتِحْمَر بالعتب وجنات خطـّاري
يالطخة كحل بطوارف القمصان
من كل ما كـَضيته..
وياك تذكاري
ياوردة بنفسج
والكـَمر نعسان
وعيونك كـَمر..
للصبح كـَمـّاري
يارفـّة نبض ..
هنيال من حّباك
وندَ كـَلك نذر ..
للصوت..
للطاري..
للبسمه التشع بالروح..
شمس سطوح
وتِــتــْـناثر شعر..
ماتوصله اشعاري
لعيونك..
عيونك حيـِرتي ابدنياي
جلـّت من حَـوَرهـِن
قدرة الباري..
وتكـَلـّي:- اتغيرت!
شو مورسومك ذيج؟
تحجيها ابعفه!
ومن ضيمك غياري
تمنـّيتك تجيني..
وتنجوي ابناري
وكـَـبالي واكـَعدك ..
عاشكَ ومعشوكَ
واحجيلك ابحالي اشصار وشجاري
واكاسرلك حناني
ابطعم خمره دير
وِتـْـسَكـْر الزمن وتلاعب اوتاري



وغنـّيلك .. غنــه
بهداي... بهداي
اعله خيـبـتـنـّه
وسـُفنـّه الراحت
ويه الروج حداٌري
وازعلك لذ ّتك..
بالعشكَ من تغتاض
وتكـَطـّر شفافك ..
عسل كـَـنطاري
وارضّيك ابْولـَـك
يابعد هاي وهاي
واتعذر سنه...
وماتقبل اعذاري
واحبك من صدكَ
من حب اهلنه الراح
مو حُبْ هالوَكِت
والشوكَ طيـٌــاري

وهذه قصيده اخرى
خاف تموت

* * *

على طولك اشعلني...
وصيح بّيه الصوت
انه ابْطـَركَ النفس..
بين الحياه والموت
و ِسْري ابنبض دمي..
لشهكـَــة الزردوم
حب تالي العمر..
عِلـّـته من البسكوت
ياشايل حلاوة خوف الحديثات
ومحمّـِل سحر...
ضحكة بنات بيوت
يامايع ترافه..
اتهيّب من احويك..
خاف اصعب عليك..
وخاف بيدي تموت!
هَـلكـَد ما تِلِح..
راج الثـْمربالعود ..
وحْـمَر على اشفافك
كـَبل وكته التوت
يمعود ... دخليك...
والـقلب شيصير!!
من تِـكَـطعَ بتوته..
امنين اجيب ابتوت

السلام عليكم

عريان السيد خلف

خاف تموت

* * *

على طولك اشعلني...
وصيح بّيه الصوت
انه ابْطـَركَ النفس..
بين الحياه والموت
و ِسْري ابنبض دمي..
لشهكـَــة الزردوم
حب تالي العمر..
عِلـّـته من البسكوت
ياشايل حلاوة خوف الحديثات
ومحمّـِل سحر...
ضحكة بنات بيوت
يامايع ترافه..
اتهيّب من احويك..
خاف اصعب عليك..
وخاف بيدي تموت!
هَـلكـَد ما تِلِح..
راج الثـْمربالعود ..
وحْـمَر على اشفافك
كـَبل وكته التوت
يمعود ... دخليك...
والـقلب شيصير!!
من تِـكَـطعَ بتوته..
امنين اجيب ابتوت

قلبي على وطني

ياوطني الموشوم بالقنابل

ياوطن الأشجار والأنهار والجداول

ياوطن الأديان والإيمان والتساهل

ياوطن الأشعار والإصرار والتفاؤل

ياوطن الأيتام والأرامل

ياوطني المقتول والمقاتل!!!

إنزف صبر ياوطن..بيٌـه الك مـٌية جرح

كــلما يهيد الألم بجروحي أذرٌ الملح

أفديك ياوطني لومية مرٌه انذبح

واشرب نخب هيبتك من المسـا للصبح

مثلك محب ما إلي ومثلك جرح ما يصح

يارمح بضمايري لا خطه ولا صابني

كـَلبي على وطنـــي

كـَلبي على وطني وي رشفة الفنجان

وبكل تحيه صبح من حايط الجيران

لو ما انت ياحيرتي ماكان كل ماكان

من غير أرض وأهل ما قيمة الانسان

بس ياخسارة الأهل

من حط رحاله الجمل

وياك علو الجبل

ولارخص علج اجنبي تتخضٌع وتنحني

كـَلبي على وطني

كــَلبي على وطني وي كل سحابة تفوت

وعن كل بطل ما بخل فوك التراب يموت

وعن كل كـَمر لو ظهر.. وبحزن روحي انتحر

والطير فوكَ الشجر

ينشد بأعذب صوت

الماي من ينغلي من لوعته ايغني

آنه انجوي ابطيبتي وكل حي طلع مني

كـَلبي على وطني




أهواك ياوطني لو جنتك ناري

وانزفلك الدم شعر واهديلك اشعاري

كل يوم نكـَعد سوه واحجيلك اسراري

تفكـَدني من ابتعد وتزورني ابداري

وابجيلك ابلا دمع واشرحلك الجاري

معذور من سرني

ومعذور من لامني

كـَلبي على وطني

كـَلبي على وطني الكل عمري جان الأهم

أسكـَيه ابمي دمعتي ويسكـَيني كاس الندم

انطيته حلم العمر ونطاني جنــٌة وهم

واني مثل هالبشر هم روح دم ولحم

السلام عليكم

عريان السيد خلف

جيٌة العيد

* * *

يناهي الشوك ذمٌـه وذات من ذات
وفرق مابين حالي وحالك إبعيــــد
سنه وصدٌك يِضَـوك الروح لوعات
ويجَملٌي الجروح جروح ويزيــــــد
أبات إبحضن صبري إليالي ويباتْ
جرح يصحه وجرح متغصٌب إيزيــــد
وأكًًول إشوالف السرحان للشــاة
إعله سـجٌه وكًاوداه الإيـيد بالإييـــد
إلك جـانت يحلو الطول جيـات
عجب تبخل علينه إبجيٌـة العيـــــد
تنينه وأملينه إجفونـٌه إبطيفْ
وصبرنه وصبـٌرينه الآه بـــــالآه
وتحسفنه الحســافه وحيف عالحيـف
عله إسواجي الدموع المالهن جـــــاه
إشيصير إعله الترف لو ينحسب ضيف
إعله غفله وعيد وصل الزين محــــلاه
أنه إبعازة الموت وحاجبك ســيف
وأمــوت إبغير صدٌة غيض ماريـــد
إلك جانت يحلو الطول جيـٌات
عجب تبخل علينه إبجيٌـة العيـــد

أحن لمسامرك ولكًاك شلكًاك
شَرِي المعشر حلاوة شــوك مابيــــك
ويمر صيفك صبر وتنَطٌر إشتــاك
تبيعك عزتـٌــك وبذلـٌـتي أشريـــك
يبو الروح إعله روح إهواك شلهــاك
وإهي إبعيـن الشفاكًـه إليالي تِربيــك
أبد ماسامرتها الآه لولاكْ
ولا جـان إعله دربك لاويــه الجيـــد
إلك جانت يحلو الطول جيـٌات
عجب تبخل علينه إبجيٌـة العيـــد
أنه ولا كًـول عنـٌك غير معذور
ولَو ماظَلْ عذر للروح ينكًــــال
لـَجَنْ ون ايساهر ليل معـذور
ألم لو من وكت لو من ولف شــــال
وانه إبحالي إعله صبرك حال مزهــور
صبر ومكابر المحتـــام جَتـــٌال
إلك عمري إعله زين وشين منذور
ولَو من السنيــن إوشال ما ظـــال
لـَـجَنْ يبقه الجفن للعين مسحور
ويظل راكد عليها النوم تركيــــد
إلك جانت يحلو الطول جيـٌات
عجب تبخل علينه إبجيٌـة العيـــد

قصيده تين العجم


بعد مايحتاج تِتعذ ّر

من نِشفـَتْ الشِفـٌه

ولونها اتغيـّر

من ثلج البديك .. يصِل صِليل وداع

والحجي السِلس بلسانك اتعثرّ

من ظلمة عيونك

والشمس رُمحيـنْ

جلجل ليلهن وتحزٌمَنْ بالشـَر

من رجفة جفوفك

والبرد بالكـَيض ..

علامة قـلب صاح الصاحبه اتـنكـّر

يامثـَنـٌي الخواصـِر

والحمول ثـكَــال

إحمولَك عِفـَه

وعـَل الخصر تتبطـّر

ياحايل ثمر .. من الجدم للراس

كل حايل ثمر

معذور من يغتـــَـرْ



ياهمزة وصل..

سبحان من ســوّاك

والخـَلـّه الظبي اعله النمر يتنمّــر

يل كـِلـّك تَــرَفْ

وشصار هالطغيــان

ربك فوكَ كل جبار يتجّبــر

ياتين العجم.. ياطعم خمرة دير

تـِسـكًًيـَني ابكـرم

وتلومني من اسكـــر!!

من تِدلع غـَــنَج

عندك عذر مقبول

رمـّــانك لـَــحَكَ

والزيج ما ينــْزَر

قصائد مظفر النواب

ياريحان
إشكَــد نِده نَكَــٌط عالضِلِع

ونْسِـيت أكَلـٌك يمتــه

إشكَـدْ رازقي ونَيـٌمتـه

وإشكثـُر هجرَك عاشـَر ليالـي الهوى ومالِمتــه

إنتـه إلسَـحنتْ الليـل بـِكَليـبي وكَلِت

موش إنتــــــه



يـاما التـَراجي مرجـِحَنْ حسٌك الصافي وغـَفـٌه

ويامـا إسفَحتلـَك باللـيالي إدموع كانت تـرفـه

ويا مـا الدمع ضـَوٌه سواد العين

وعينـــكْ صـَلفـَه



وتِدري تِنـيتْ الدفو إبلهفـَة ورده

ومــاجيت

ونـَيٌمني الثلج والشِته كِلـٌـه إتعـَدٌه

!! لا بالمحطـٌه رف ضِـوه

!! لاخط إجانـه من البعد

ولا ريــل مـَـرْ عالسـَــــــدٌه

والشته كله تعده كله تعده

الشته شال إشلِيــله من يمنـه وعـُبــَر


وسالته عنك ياشتا العشاك


ماعندك خـَـــبرْ ؟

وإعلـَكَـنه للصيف اليجي إروازيـنٌه السمره شمِع

من ينزل أوٌل الدفو بنيــسان يهتز الضلِـــع

يمكن يخضر عالضلع

يمكن بعد بالروح , يا ريحان وصله تنزرع

والكَـيظ إجانه وإنكَـضه

و رَدْ إنكَـضـه

و رَدْ كَيــظ إجــه

والزِلـِف هجرك فضـٌـضه

و رَدْ فـَضـٌـضه

ومـــامشْ رِجــــــــــــه



ولساع من همسه تجي من بعيد

يخـضـٌرْ الدَمِــع

كل نسمه ترفه من تفك الباب

يخنِـكَنـي الدمـِع

ولِسـٌـاع ولـٌذتنه إنكَـضـَتْ

أهجسْ عالكَصـايبْ شـَمِـعْ

وِردود أكَلـٌكْ يمتـــه



كل لحظه من هذا العمر


وعـٌتْ حسافه بكَـلبي


يا أوٌل الريحانْ


يالمَرٌيت مرٌه إبدربــي


يا آخر إسـواجي حنـيني وحـُبي


من يوم طيفك هجر نومي ما نمِــــتْ


حنية يا جذاب منك ما شِفِــتْ


من ظـَني كـضـٌكْ بالحِلم


عنبر فِحـِتْ


ومن رِدْتْ أجيــسـَكْ


جـِسِتْ روحي وفرفـَحِـــتْ


أترف من أجفاف المهـــر


قندون ما ضــايكَ شـَكر


ياحـِلو ياجَـرٌة كحــــــِلْ


ياحلو يا بوســة سـَهَرْ


ياتـَرِف يا ييــزي قهــَرْ


شِيضـرٌكْ بكل شتا الولهــــانْ


لو صـَحوة مطـَرْ


والشته كله تعده كله تعده


!! لا بالمحطـٌه رف ضِـوه

!! لاخط إجانـه من البعد

ولا ريــل مـَـرْ عالسـَــــــدٌه



لِســٌاع مشدوده شـَبكَـتكْ عالخـِصِـرْ


والركَـبه من تلتـافْ للبوسـه جـِسـِرْ


بسْ إنته تدري إشلونْ رصعه بالنـَحَرْ


والشته كله تعده كله تعده


الشته شال إشلِيــله من يمنـه وعـُبــَر


وسالته عنك ياشتا العشاك


ماعندك خـَـــبرْ ؟


لك يا شته العشاك ما عندك خبر؟


والكَـيظ إجانه وإنكَـضه


و رَدْ إنكَـضـه


و رَدْ كَيــظ إجــه


والزِلـِف هجرك فضـٌـضه


و رَدْ فـَضـٌـضه


ومـــامشْ رِجــــــــه


قصيده مابجيتك

فاركًيـتْ إنتـه السفيـنَه وآنه جايبلـَك بحــرْ
خِفِـتْ !! مايكفيـك عشكَ الناس
توصــلْ فرح كَلبــكْ ..
كَـٌعديتْ الثلج من نومــه الثجـــــــيلْ
وسلسَـلتـْلـَكْ حزن كَلبي سلسَبيــــــلْ

جـِبتْ سلطــان الحلمْ ...
شِفتـَكْ مِثــل ممسـوح بغياب الشمس
فاركَت حِلم النـاس ومَلـٌيتء السفينه والسفَرْ
إشلـونْ كَلــبك طاوعـَــكْ
ماتكَفْ عالجيــــــــــــدوم
وَجـهَكْ كَمـَرْ ونجـــــــــوم
تنطيــنه كل لحظـه إتجــاه الريـــــــح
نِشتـــــاكَ الكَمـــــَـر
يصعَدْ حِسـِنْ وجهـــك كَمــَر

مابجيــــتك ..... ما بجيـــــــتكْ
آنه بجـٌتني السفيــنه
إمنين ماطـكَ الرذاذ إتفكْ كَلبها إتريد تبحـِـــر
تِدري نـوباتْ السفن لو ضاكَ خاطرها
إبجُبـُنْ سفـٌانها إتســورب وحدها ؟ ؟
تدري نـوباتْ المحبـٌـه
إتمـِلْ طبُـع محبوبـها
ويغفــه عالجتــاف الســــــهر ؟؟

مابجيــــتك ..... ما بجيـــــــتكْ
مَدري منهو إبصدري يبجـــي ؟؟
مدري منهو إيشَكَـٌــكَ إبكَلبي كواغِــــد ؟
مدري منهوْ إيريـــدْ يرحـَـلْ ؟
مدري منهو إيجرني بيدَر للمطـــــــر ؟
مابـِجـيتـَكْ .. درت عيني للبَحــَـر!!
أبجي المســافات الهِمتها ويـــاك !!
مابجيــــتك ..... ما بجيـــــــتكْ
إنتـه تكذب مابجيـــــتكْ
آنه هدٌيـت السفيـنه
وسيـٌسـتها إشراع أسَـبكَ الريــح
ولا خاروعـه عندك للمطــــــــَـــــرْ
..... ما بجيـــــــتكْ
آنه جايبــلـَكْ من دموعـي بحـَــــــــرْ

السلام عليكم

ولمظفر النواب ايضا

مطر

مطــر مايســوَه المطر

أصفن إسنيـن العمـــر


ما مطــرَن أيــامَكْ علَيـــٌـــه


ومن جريــب إتعلمـٌيت الناس سَمـٌيـتك


مطـــر


مثل المطــــــر


لملِميـتْ الروح قدٌاح الحديقه الغاد من النوم


حظـٌرت السطح


وبدمعي جٌـــواٌني المنــاطـَر


جـَنها مطرت مثل كذبـاتكْ أمس


زخـٌات مابيهاش يحبيٌبْ مطر يـِسوه المطر


شَكَكَتْ كل الكتبته


ورٌقيــته إبعَذب ريــجَكْ


دفتر إيناغيــك من إزمــان


مايرضـاش واحد غيــرك إيوَرٌقني


من كل البشــر


صِـدِكَ مطرت


!! لكن إحنه ولارذاذه وخضـٌرينه


وباجر إيشوفون فوكَ السطح


وردة ليـــل


سكتـــه


ومدري شنهي


مشط .. ومرايــه إبوسطها إثنين


ضاعو بوس ما منهم خبــــــــرْ

الام

ضـِلعَكْ منْ رجيـته


إلضِلعي جَبـٌرته وبنيــته


يَبنـي إخذني إلعُرض صدرك


و أحسب الشيب اللي من عمرك جنيته


يَبني طِش العمى بعيني


وجيتك بعين القلب أدبي على الدرب المشيته


شيلة العلاكَة يَبنـي


تِذكر إكتـافي بلعب عمرك عليهن


سنة وجفوفك وردتين على راسي


وبيـك أناغي كل فرح عمري النسيته


يـَبني شوفك يبعث الماي الزلال بعودي و أحيا


وانه ميتة


أبيض عيونك لبن صدري


وسواد عيونك الليل اللي عد مهدك بجيته


وأبنك التوه يناغي الخرزبالكاروك يابني


كَـِتله لاتخاف اليتم جدٌه


كًـِتله يابن وليدي من يجبر على الأيام


تلكًـه حزام ابوك الماطواني وما طويته


تلكَـه منه خطوط اضمهن حدر ضلعي


لحد ما موت بعز على السر الحويته


ياعمد بيتي وكَـمر ليلي


وربيع الشيب والعمر الجنيته


جيت اهزك يـاعمد بيـتي


يكون الدهر ظعظع عظم منك للمِـذَلـٌه للخيانة


وساومت جرحك على الخسة وخفيته


يابني خلي الجرح ينظف


خله يرعف


خله ينزف


يا بني الجرح اليرفض شداده


علم ثِـوٌار ويرَفرِفْ


يَـبني إبن الكلب يرضع من حَليـبي


إو لا إبن يـرمي إلـي خبز البراءة


يابني ياكلني الجلب عظم ولحم


وتموت عيني ولا دناءة


يابني هاي ايام يفرزنهـا الكَـحط أيام محنه


يا بني لا تثلِمْ شَـرَفنـا


يا بني يا وليدي البراءة تظل مدى الأيام عفنة


تدري يابني بكل براءة


كل شهيد من الشعب ينعاد دفنه


وخلي ايدك على شيبي


واحلف بطاهر حليبي


كَـطرة كَـطره

السلام عليكم

وللشاعر عريان السيد خلف

انته .. ؟ منهو انته .. ؟
او جالغريب ... اعرضت عني !!
.. اوضيعت كَلبي .. اورجفته
آنه ، من جافاه خله .. او مانصح
.. وياه وكته
آنه زين .. او شين .. لأجلك
غلّست عنه .. او حملته
كورت .. حسرات كلبي .. او شوكَي
.. بين اجلاي ، جبته
اوجيتك .. ابتله دليل ..
المايعن .. واشكثر لمته
جيتك .. اوجرني الهوى ..
اوطاعة .. ذليل الشوك ،
طعته
اوجنت . اظنك .. طيب .. اوجفك
على الطيبات ، فلته
حسبّت لسه اعله حالك .. اريحي
اوذاك الوفي انته
حسبت .. غم الوكت .. يا رخص
الحساب الحسبته
جيتك .. او حسبالي اخو..
اوسمت الاخو .. يطلب
ابدرته
يا ونين المانفع .. جارد صخر من
مات ، لاخته
او ياحسرتي الطوّلت .. ومكَضي
ليل اجفاك .. سكته
صابر .. اوذوّب سواد العين ..
صبري .. او ما جزعته
وانته ابد .. ما جنك انته حتى
يومن كوضّت كَلبي اوبلايه
اوداع عفته ..!!
وآنه اجيتك .. واليجيلك ابزوم
عاني لشوفتك .. ليه ما عرفته ؟
لا تلكَيته ! .. بسلام احباب ..
ومحاضن حضنته
اولا بجيت الحالته .. اولا نشّفت
.. بايديك دمعته
اولا كَطعت النفس منه ، اوطردة
الضايع طردته
اولا نشدته ! .. هذا المتاني الوفه
.. هلبت يناهي .. اعرفت
قصته
يا ندمته ، يا فشلته اشكَد تعب ؟
تالي ابجحف مكسور .. بعته

السلام عليكم

وهذه قصيده الجثه والدود من ديوان القمر والديره
لعريان السيد خلف

تنيتك عود .. ينشاف العطش بيه ..
او عله .. المامش ، اهروشي اتجود
الوذ ابشيمة العاكَول .. واصعد .. عله
الآه اصعود
زمراوح يعمر اجفاك .. جرح ايصيح ..
او جرح يهود
او تنيتك وانت ميت شوك
ظنه اعله اليموت ايعود
اتاني الود .. يدمعة عين .. طاحت
وشيردها اردود
واشعزة الدمع بالعين .. لو ..
شح ساعة المنكَود
خليني اعله بالك .. طيف .. لو عادت
ايامي يعود
او خليني اويه دمك شوك .. من
شوكي البلايه احدود
ومحالل بعت وشريت .. بيهن والعمر
معدود
او مو ندمه الغزالة اتطيح .. صيده
ابشبجة الصايود
لاجن يالعزيز الحيف .. عالصايد
يكَع مصيود
لو ذيج الليالي اتعود ، او لو شطنه الجزر
يومين .. خنياب .. او يرد صيهود
جنت اصرخ : يهلغراف ما تغسل
اكَلوب السود
وتشلبه اعله سور الغيض .. لو ..
باب العتب مسدود
وكَبالك وافك الروح .. من .. حبل
الوفه المعكَود
وتكتر ولك دنياك .. خل تنكَص ..
او خل اتزود
واتصبّر .. يكَلبي انعيش .. تتواكَد
واكَلك هود
دنياتك نحيسة عين .. والوادم ..
خلية جود
وصوابك .. يجرح الآخ .. كل آخ
التلجمه يزود
يمعتب هظيمه اعليك .. تحصد ..
باثة المحصود
او تعتب والعتب مدفون .. جثة
التم عليها الدود

هاشم الفياض


انتماء

انتمي لكل الطيور الخالطت دمهه بدمي

انتمي لكل دمعه حلوه وضحكه حلوه ابكل شفايف آدَمي

انتمي لكًـطرة نزيف اتساوي كل لمعة شعرنه الملحمي

انتمي لميزان اهلي الماغـّرف فد يوم جـّفه المـّايله

وانتمي لكل جلمه مني وكل حرف مكتوب بيدي وكًـايله

انتمي لسوك الشيوخ البيه ثالث علم طب جان ابوي الشايله

انتمي لنهر الدموع ابعين امي المانشف فد يوم ريجــه

انتمي الكلمـــــن مشـــــــه ابدرب المحبــــه

باع روحه ومارضــه ايبطــــــل طريـــــــجه

انتمي لكلمـــــن يبـــات الليـــل جايــع

مادنت نفــــسه واكـــــل خبـــــــزة صديـــجه

انتمي لبستــان جدي الما يحب بستــــان مثلــه

وانتمي لكل نبته غصبن عالجروح البيهه تعله

واكـره النخله التحمل مره وحده ومن تحيل اتحمل سله

واكـره ابنادم مثل عصاة موسى الينكًـلب كل ساع شكله

آنه حبيت العراق ووعلكًت بعيونه اهدافي ومصيري

ماتخثر دمي من طول الطريج ولاعثر جدمي ابمسيري

وغيري من ساوم عله حدود العراق وباعه غيري

وغيري ماكمــل طريجـــــه وطـــــاح غيـــــري

من آكـــــــل مني الحصـــــــار ماكلــت من قوت غيري

صـــــــح بـــــعت مـــــــره قمــــــــيصي
بس جنت معذور من بعت القميص حتى لا بيعـَن ضميري

طالب المالكي


روحي تــّاله
روحي تالـَه إتربـٌتْ إبستانكم

يوم تعطش تروه من نهرانكم
تعودت تشرب زلال الماي
وأنتم ألفي الثخين وانتم نجوّم بسماي
أحسابي مو هذا الحسبته وأختلف من عندي رأي
دار محجالة وكَطفني الوكت عن عيونكم

دار محجالة وكَطفني كَطفه عبرني البحور
وإنطحنت بعين رحه وبيدها الدينا تدور
لاشريعة ومنها أعبر ولا وسيله للعبور
مابكَه بس دمعي أهلـٌه وبيه أسلي فراكم

مابكَه بس دمعي أهله وبيه أحني جفوفي
مولح صبي العيون عليكم وقل شوفي
خاف تعمه عيوني باجر وهذا اكبر خوفي
لو عميت الجارة شنهي شلون اشوف وجوهكم

أرد أشوف وجوهكم وبّيه اكحل عيوني
سنين عمري أنتهت شمعة بليلكم طفوني
شايل فراك السنين شايلة على متوني
ركَد حيلي يمته أصلكم واغفه بين أحظانكم
روحي تاله روحي تاله روحي تاله

السلام عليكم

لقمان الحمداني

عتب العراق

صحيح انتم جزء مني وصحيح انه جزء منكم

اجيت اتشلبه نص الليل اصعد فوك اصيرن كًـمر ديرتكم

اجيت ابطكة الجيلات ما حـس بالجدم لن الجدم عدكم

اجيت افتح اعيوني انهار تطفي النار لو حسيت هاي النار تاكلكم

صحيح الكًـلب من يبجي عضو منـه تنــــوح اعضـــاه

اووجعي اليوم ما ظــــــن بيــّه يوجعكـــــــم

انجرحت اهواي ماكًلت آخ خاف الاخ تحزنكم

وتطشرون هذا اهنا وذاك هناك هاي إجفوفي التلمكم

خناجر غدر جني ابظهري مسمومات شافت عينكم وانتم ولا جنكُم

صدكً مديت ايدي وشلعتهن حيل

وصدكً سال النزف منهن يطهركم موحكًـي من اعاتبكم

موحــكً القوافي اليوم من تغتاظ مو حكً من تزاعلكم

موباجر تره اتطيحون شتحشمون ياهوالكم

اريد احجي ارجع احجايتي الشينـــه

فشل غصبن عليه القلم يشتمكم اعاتب والعتب شيفيد ميهمكم

بعد يحرم عليه الجدم كـون ايخطي عتبتكم

ولا افـــر الاذاعـــــه وبأذني اسمعكم

وانتم.. يل وكًـفتو وياي اخوكم انه وانه الكم

ارش عمري ابدربكم هيل ورد قداح اصيرالكم

اطلبو اتدللوا اشتردون اجيبلكم

لخيوط الشمس اصعد كًـلايد منها اصوغلكم

العراق انه العراق الماغمض جفني

بهذاك الليل طول الليل احرســـكم

حسن السيد عاجل

عليه مرادف النكبات

وطكًات الزمان يضيع بيها العــَــدْ

متعود عليهن والتفوت اتهون

لان ادري الوراهه اتصير منها أزيــَـدْ

فصٌلت الحزن ثوب ولبسته اسنين

لا يقبل اذبه ولا قـبل يركَــــَـدْ

وحملني الزمان اجروح فوكً جروح

وجروح الزمان اشلون تتضـــمٌـدْ

واضحك والسوالف موش جنها اوياي

مابـّين خلل للناس متعـــــــمد

او من ادري برفيجي يريد بيه يعيل

بعتابه الخجل ياخذ ني واتردد

ولافطره وسذاجه وموش تايه راي

لجن طبعي التسامح وي كل أحــٌــد

ولاعمري بنيته ابدغش وي الناس

ومن ابني العلاقه ابنيها حل وشــــد

ولاعمري جفيت ابعشرة الطيبين

ولا عمري بديت ابكًـطع حبل الــــود

انسف بالربع واوزنهم بميزان

وموكل الضحك وياي بيه أضمـــَـدْ

اسايرهم حياء وادري ما يوفون

لمس بيدي لمست ومنهه متأكـــــدْ

جثيرات السوالف والمجال يضيج

وموضوع الافتحه ادريبه ما ينســـَد

اكره كل منافق يحجي بالوجهين

يضحك للجبيل وهو قلبــه اســـود

واحبن هالوطن وترابه والطيبين

ودعليه بصلاتي من اركع واسجـــِد

السلام عليكم

وهذه مجموعه من القصائد

تفتكر ترتاح إيدك ع المخدة.. وراسك يفتر دواره

نمت وتخيلت نفسك نسر ميت طار كل عمره خساره

وضرب جنحه إبصخرة أكبر من مداره

الساعة وحده.. (تفتكر تحلم بوحده)

تفتكر تكدر تمد إيدك وهي أسلاك متكهربه وتتلمس نهدها

إمْلي نومَكْ بالتشهي، وإخجل بكد الأحلام

صعد مجد الليل لعيونك وطبكها على الأيام

يوم الأحد ما إجه إبالك نهاره

الأحد مدكت ساعة وحده

وأهجست راسك ثكيل ع المخدة

وحلم وجه ع المخدة

الروح تحجي القلب ساكت

إنتبه راسك سفينة.. إتعطلت بليل المدينة

قبل ما تعطل الموجه وتتلف بصدر السفينة

إنتبه راسك مدينة.. الناس بيها تجي وتروح

وشوارعها العريضة لا تجي ولا تروح بيها

أصرخ بقارورة ضيقة حتى لا ينسمع صوتك، وأنت تحلم بالكلام

صعد مجد الليل لشفافك وطبكهن ع العبارة

تفتكر تمتلي إيدك يوم الأحد

وانت فارغ مثل ساعات النهار

إتخاف من روحك وتنساها كذب ساعة وحدة

إتخاف من إيدك وتثنيها بخدر فوكـ المخده

إتضوج من ظل السكملي

إتغمض عيونك تصير الغرفة ظلمة

عينك اليسره ضعيفة تقره باليمنى رسالة

على قلبك إحفظتها من زمان

إتبركس بنشوه غميجة وفوج بيها

وإجوي أحلامك المكصوصه بجكاره

إتوخرت جدامك الحيطان.. اللي بجيت جم مرة عليها

وزتتك للبيت ما أمنت بيها

إختبي بكلمة تفهمك

تبسط إيدك.. تاخذ وتندم وراها

صعد مجد الليل للكلمة وطفاها

لو كمر روحي ما أطوف الدنية من أولها لأخرها

وأذب روحي بدجاها

لو بيديه أحركـ أوراقي القديمة والجديدة

وأشمر همومي بلظاها

الشمعة من يكضي ضواها

الليل هم يكضي وياها

إختبي بنفنوف ضيّكـ.. حتى تتعلم شنو معنى النفاهه

الليل أملس.. والضوة مثل الحجارة

الليل أملس وأنت حلمك خشن يزلكـ ع المخدة

الليل أملس مثل زبده

إختبي بلحظة تفهمك

آخر حجاية تفكر بيها.. تغتال الكلام

إفرز الفي الرمادي الترف من جنح الحمام

تفتكر يمتلي قلبك ريش ناعم

لمن يرد السلام

إختبي بكلمة تفهمك

وإحتقر كل الكلام









رؤيا


فرّيت المدينة بليل

فرّيت المدينة وخبطت ع البوب

كتلهم إجتِ الريح.. دهو البوب

أخاف الريح تخلع بوبكم ونظل دشر..، وإدور بينه تدور

وكل واحد يحط لوحه على جتافه سفينة وينتظر طوفان

وكتلكم.. وكتلكم.. وكتلكم

وكلتوا هلولد حلمان!

ولا واحد سمعني إشكلت قلبي إنشكـ

ولحم جفوفي وكعته إبدرابين المدينة.. وإنهره من الدكـ

فريت المدينة بليل

شفت الريح جتي من بعيد تون.. بداية سيل

شفت النجم فص محبس بأصابعها

وظهر جدها محني على السجادة

طوه أخر صلاته،.. وجه السجادة بركن حجرة

وجته الطفلة من فتحة الباب تفوت

خضره تصيح كعدوني

وقدمها الحافية يرسم ساجية إزغيرونه بالكمره.. وروحه العدله تسمعها

وجمرات الجكاير فتحت بالظلمه عين الديك،.. راد يصيح

وتوترت حنجرته

وصاحت من بداله الريح

وصياحي اختلط بالريح

وبقيت أصرخ.. أصيح الحد عمود الصبح ما بيّنْ إبين الريح

شفت الخيل..، يجدح ع الحصو والريح حافرها

ورثوا من شرارتها جكايرهم

وركبوا على ظهور الخيل

والعثرة الزغيرة توكع إعكادة





أسوار بلا مدينة



بنادم لكاج بكاع مهجوره

يحضنج سور من جوه ويحضنج سور من بره

وشميدور بنيادم وراج ايدور جدامه عريض السور

وشميدور يعلى بعينه سطح السور

وما من حفره إلا وظنها سطح السور

وظل يدور

بنيادم تعب من كثر مَفتر صار فراره

داخ وكلت أفكاره

وفرَحْ لمن لكاله حدر سورج بره وصلة فيْ

فرشها ونام فوكاها.. وعليها إرتاح

وصلة فيْ فرشها السور للغربة

كشط منها بأظافيره وستر وجهه اللي ينضح عركـ

ينضح حيرة بنيادم

ينضح تعب بنيادم

بنيادم إيدّور على وصلة باب كل عمره

يمكن تنفتح بالسور

بنيادم

يمكن يكدر إيطكله شبر بالسور

بنيادم

كتب ع الحايط أيامه، وعذابه، وليش هوه يدور

بنيادم

بنيادم رجع وبراسه ظل يدور.. شكل السور

أخذ يحفر.. وغابت الشمس ع السور

وطلعت الشمس ع السور

حط عينه على الثلمه وأخذ ينظر

بنيادم.. أخذ ينظر من الثلمة الفتحها وبهت بنيادم

لمح من عدها سور أخر بعد هالسور

وظل يحفر وظل يثلم

عبر أسوار بنيادم

إلحد ما ضاع بنيادم

إبين أسوار ما تنعد

ترك خلفه ثِلَمْ كامت وراه تنسد

وبنيادم أبد ما رد

وشاف أسوار ما تنعد

ولا تحضن مدينة ولا تحيط بشي

ولا تحوي فرد شي غير بنيادم

وظل محصور





موقف أخر



وين ما تلكي ظلم

ظلم.. مقنّع، صريح

حشي إصابيعك بإذانك

وإغمض عيونك وصيح

متى ما تسكن الريح

تلكه طير مطربس بدمه ذبيح



وين رايح؟!



وين رايح بالمحبة؟!.

بروح ما خضر سعفهه

والديوجه الغبشت بتالي حنينك

محد أشكالت عرفهه

إشكثر رغباتك منين تفوت

والدنيا أشكصفها.





لا إمتثال



كتلي هاك.. هاك الإبره هاك الخيط شد جرحك

وما مديت إلك إيدي وكمت أضحك

وشفت الحيره بعيونك سؤال

أكبر من الإبره والخيط وعقلك ونصحك

والسكته عذاب وياك

وأخذت إيدك الأخرى وسكتت وياك

ومن بين الدمع كتلك

لا تحتار بالمره

أنه جرحي بضميري ما تلوحه إبره

ولا يندل عذابه الخيط من بره

منقوووووووووول
لعيونكم
تحياتي
عراقية كوول

الله الله عليج عراقية كول
مبدعة ومتميزة كماكتني ومازلتي
فابدعي وحافظي
تحياتي الج

نورتي حبيبتي نسنوس
شكرا لتواجدك العطر
وكلماتك الرائعه
دمتِ بهذآ الاطلاله اللميزه لدي
كل الحب

رووووووووووووووووعة