السلام عليكم ,, اليوم جنت مستلقي على الأريكة بصورة افقية بحتة ,, و صافن عال بنكة و اني اسال نفسي هاي انباكينا لو البنكة جاية من الشركة نكص ريشة و حاولت اسوي براءة اختراع انه اخلي البنكة تفتر بالعكس و اتصير ساحبة ,,, ثم اني متعود انام باي مكان ,, لان الفراش مليان هدوم و مالي مكان انام ,, مو فراش تكول عبالك عربانة مال باله ,مرات انام بالكنتور لان هدومي كلها برة ,عادي تجي امي تفتح الكنتور تلكاني معلك من شعري بصف القمصلة ,, و مرة فاتت لكتني شابج البنكة و نايم فوك ,, اي والله جنت قريبا عال سكف بارتفاع مترين عن مستوى سطح الكاشي ,
- انزل ابن القرد !!! (امي بصوت شافط)
- لااااااااااااا لا اتفتحين البنكة راح انلطش بالجامة و اصير بوستر
المهم ,,, بهال اثناء خابرني ولد و كلي لكيتلك شغلة ,, اجلف جهرتك و زين و فرمت شعر ابطك بالبلايس و البس قاط و راح اجي اخذك
بعد فتكة من الزمن ,, أي هنيهة من الوقت ,, لكيت نفسي متألق و متأنق و واكف بباب وحدة من قنوات التلفزيون دا اقدم طلب عمل بصفة مذيع ,, اني ما عبالي راح اشتغل بالتلفزيون مذيع ,, عبالي راح يستغلون كرشي يوكفوني بمكان عالي اشوش بكرشي عال بث مال باقي القنوات فهاي القناة اتطك و تشتهر ,, او يجوز يريدون ممرضة ,,شتصخم ممرضة بقناة ما اعرف ,, المهم
- ابني مكرش (هذا المخرج , عندة شعراية وحدة مسويها سبايكي و شواربه كلش كصيفة مال هتلر اني عبالي اول شي مو شوارب عبالي شعر خشمه طولان ) لازم اهم شي ما ترتبك و لا اتخاف ,, لازم تقرة نشرة الاخبار و انتة برباط جأش ,, اني ما افتهمت شنو يعني رباط جأش بس احتياطا مديت ايدي و عدلت الرباط مال قاط و ما كدرت اربط القيطان مرة لخ لان ما اعرف الباسوورد (اي حذائي باسوورد من اخلي ينسد على رجلي و الطركة اتطلع صوت طيط يعني هاهية لبستة)
- ابني مكرش (هذا مدير التصوير ,, اكرع و بنص كرعيتة شامة و بنص الشامة حباية مال شباب ) لازم تميل جسمك بزاوية و وجك شوية اتميلة و تباوع عال كامرا و المكرفون كدامك,لازم اتسيطر على نشرة الاخبار ,, مفهوم؟؟ حتى تطلع حلو بالكامرا هاي تعليمات المخرج
- اكيد طبعا , اسيطر على كشرة الاخبار , لازم اميل المخرج حتى الميكرفون يطلع حلو ,, هاي تعليمات ام المخرج
ما اعرف شكام يدردم و عافني و طلع بس اخر شي سمعت ,, لابو الجابك هنا ,, معجب بيه كلش !!
- شكرا اختي هاج القلم جنت دا اعدل بي كم جملة بالنشرة
- ولك هاي شصخمت ؟؟ هذا قلم حمرة مو قلم جاف (هاي الكوافيرة اللي جانت دا اتعدل وجي قبل النشرة و اللي ضاجت من كتلها بس تحديد بلا زحمة و الزلف اريده عريض شيش كباب )
- اخوية كعدتك غلط ,, (هذا مساعد المخرج)
- ليش؟
- الاصول تكعد عال كرسي ورة الميز ,, مو تكعد عال ميز و اتدندل رجليك و حاط المايك جوة ابطك شنو ركية هو رحمة للسماوات ,, اكعد عدل الله يخليك
اتذكرت التعليمات الاخيرة ,, نصي راسك شوية ,, شوية دير وجك عن الكامرا حتى مساعد المخرج يطلع حلو ,, اقرة الخبر بلا ارتباك ,,
و بدأت المهزلة ,,,,
3 2 1 ,,, تصوير
لكيت نفسي عال هواء و المفروض اقرة اول خبر ,, ابتعدت عن وجي الظاهر ازيد من اللازم ,, لان سمعت المخرج يشاور المساعد
- اكو قانون جديد بفن الالقاء بحيث علبات المذيع تطلع بدال وجه ؟
- لا استاذ بس هو دار وجه ازيد من اللازم ,, يمكن النشرة مكتوبة عال حايط وراه و ديقراها مناك
تالي اتذكرت انه لازم انصي وجي ,, عدلت وجي و نصيت كلش بحيث كفشتي طلعت علة كد الشاشة ,, و كامو المشاهدين يشوفون شعار القناة و الباقي كله شعر و شوية وصخ عبالهم من الشاشة و ما يدرون هاي الكشرة مال شعري
- هو ليش ديسوي هيج ؟؟؟ (المخرج للمساعد وهو راح يبجي )
- ما اعرف استاذ راح اسأل مدير الانتاج اذا المخرج صار بي صرع عال جو شنو الحال لان شاك بهيجي شي ,, و لزم كتاب يحاول يلكة الحل تالي شمره لان طلع كتاب طبخ ,,
اني انتبهت على اللي صار و عدلت باخر لحظة وجي و بديت اقرة
مشاهدينا الكرام ,, بلا ارتباك ,اهم شي مشاهدينا الكرام ما ارتبك , (هنا المخرج سوالي اشارة ما اعرف شيريد ) ,,, و سمعت المساعد يدردم ,, ( لأول مرة في تاريخ البث , مذيع بنشرة يسولف وية العالم عبالك ولد خالته جايين يمه )
- مشاهدينا الكرام المخرج ينقل تحياتة الكم مخرج ,, يمعود مخرج تعال حيي العالم ,, (طبعا هذا كله عال جو مباشر)
المخرج طلع صوت برييييط و وكع فاقد النطق و كام يعضعض بالرجلين مال كرسي اللي جان كاعد عليه
مشاهدينا الركام ,, في اخبارية عاجلة هس توا وصلتني ,, استشهد احد المخرجين الشباب في قناتنا الكريمة , بلا ارتباك , و الان ننتقل الى الاخبار الرياضية
فريق الشطرة ينسحب من الدوري الاسباني ,, فريق الصومال لكرة القدم يحتفل بانتقاله من المركز 112456 الى المركز 111666 عالميا
فاز فريق ريال تبريد على فريق فشلونة في المطاراة التي سوف حدثت البارحة و اكد الرئيس التركي كرزاي ان فنزولا ستحل مشاكلها الحدودية وية السنغال بعد الانتخابات في هاييتي ,,
(المشهد كدامي المخرج ميت و مساعده كاعد عال كامرا يلطم و ام الكوافير حطت شكو مكياج بالغرفة علة وجها و طلعت اتكمز مثل المخبلة وهي اتصيح كرعة و اخبل شحال لو عندي شعر ) و اني كملت النشرة
" من المتوقع ان تشرق الشمس باجر مثل البارحة هيجي وكت و لمعرفة تفاصيل أدق اكعد من وكت ,,,
و الان مع احوال الطقس ,, من المتوقع ان يسود كباب ,, عفوا قصدي ضباب مدينة بغداد و سيكون مدى الشم محدودا شكرا و الى اللقاء ,,
كملت رحت لمدير القناة حتى اسمع تشجيعة ,, لكيتة صاير بي جلطة قوية حلكة مايل صاير بصف اذنه اليمنة و عايفلي ورقة مكتوب بيها
امشي اطلع برة
طبعا المخرج صحا و هسة هو خياطة ديشتغل بالبصرة
الكوافييرة لكوها (لابسة من غير هدوم ) و تلطم و تحجي وية روحها و تباوع على اصبع رجلها الجبير و تضحك و هسة هية اتعدل شعر بغرفة بالشماعية للمخبلات
مساعد المخرج صفة و طلع لنيجيريا
رجعت و استلقيت على نفس الاريكة و اني اسال نفسي
هاي شبيهم ؟؟؟
