حلم يقظة بظهاري الصيف
اريدنك تجيني وناري تطفيها...
ياعين الشمس يانهر من شموع
كَاعي امفطرة وتريد راعيها...
ياغابة حلم يانبض هاي الروح
ياحلم الطفولة وكل آمانيها...
أضمنك ردت صورة أبياض العين
أخاف أبجي عليك ودمعي يمحيها؟؟
أذا أكَبالي وأكَول هواي عني أبعيد
وأظل مشتاَك ألك وشلون تاليها؟؟
جرح الينجوي يبره تراه أبساع
اريدنك جمر لجروحي تشفيها...
وإذا حبك سفينة وكَلبي صار أشراع؟
معقولة السفينة أتبيع صاريها؟؟
ومعقولة الرموش أتبيع ماي العين؟؟
وياروجة ألتمل وتعوف شاطيها؟؟
يبو اشفايف عسل والعين لون الياس
ذبلانه الشمس من خدك انطيها...
أخذني بسفرة أعيونك جفن نعسان
أريد بحضنك الدمعات ابجيها...
أريد وياك تاخذني الشواطي الشوَك
نهر عطشان روحي بشفتك ارويها...
اكتبلك شعر واعتقد ماوفيت
خجلانه القوافي وكل معانيها...
لأن انته بحر روجاته من بلور
ولأن كل المعاني الحلوة حاويها...
ياجلمة احبك ميتة بالشفتين
لااكَدر اهيد ولاني حاجيها!!
أبجي مو دمع صدكَني جمرة نار
ومحتار بدمعتي شلون أداريها...
ومحتار بدمعتي شلون أداريها...
******************
