رحت لكربلا مشاي
رحت لكربلا مشاي – كاصد نصرة حسيني
وكاصد امنع الظُلاّم – وحامل سيفي بيميني
وحامل راية الاطهار – احامي بيها عن ديني
وامشي واذرف الدمعات – من كلبي ومن العينِ
واصيحن جيت انا لمولاي – افدي بروحي وسنيني
روحي فدوة للعباس – وروحي فدوة لحسيني
وينه اليدّعي الاسلام – ويفَجّر بالمساكينِ
شمالك يا عدو الاطهار – تذبح منحر الدين
فجّر ما اخاف الموت – حب حسيني يحييني
افديله العمر والروح – وابقى بدربه تلكيني
سير بدربك التهواه – وامشي بدربه خلّيني
ما عندي درب الكاه – غير حسيني يهديني
دربه درب اله الكون – والله اعليه يوصّيني
واحمد ربي هيج اختار – بدربك ما يمشّيني
يمشيني بدرب الاطهار – ومن حبهم يغذّيني
ربي بغيرة العباس – وبخوته يربّيني
يحجي ويا النهر عطشان – يكوله لا تروّيني
شلون اشرب وأعيف إحسين – ينفسي لا تغرّيني
ما اشرب يا دنيا الماي – لوأن تبقي تعذبيني
يريت الكطعو الجفين – كطعو دونه جفيني
ويريته سالم العينين – واسهام العدا بعيني
ذبحوا نحري يا عباس – لمن ذبحوا حسيني
لكن حبه ما ذبحوه – ظل يجري بشراييني
وابقى بدرب ابو السجاد – امشي شما يأذّيني
لو أنْ امشي على جمرات – وعلى سيوف وسجاجينِ
ابقى الخادم لمولاي – غصباً عل يعاديني
واذا تمنعني انس وجان – من إزيارة احسيني
ما تكدر تبوك حسين – من كلبي وتنسّيني
يبقى الخالد بذكراي – مهما مرت سنيني
ومهما ظلموا الظُلاّم – تبقى دموعي في عيني
واظل اكصد ازور حسين – وتظل بدربه رجليني
ويظل كلبي يحبه هواي – ويخدمه ويخدم الدينِ
يا حسيـــــــــــــــــــــــــــــن
ِ
