طويت شراعي
لاشرك ولاغرب
رسيت
ولاتهزني الريح من اتهب
كتلت الشوك
ودفنته برماد الروح
وكتبت اعله الكبر
مسكين جان ايحب
ومسحت اثار جدمي
من الدرب ومشيت
اخاف الدرب
يتبع خطوتي ويعتب
علمت الكلب
مايلتفت لهناك
اخاف ايمد اديه
ويرجع ايجلب
بجيت وخلصن دموعي
واريد انساك
ياجرحي
العشت بدماك متخضب
أريد ارتاح
من عمري الكضيته هموم
بلجي بأخر الايام
الكه الطب
بلجي
باخر الدنيه يطيح الخوف
من كلبي
واعدل ظهري المحدب
اريد امشي بدرب
مابيه ندامه وهم
اريد اغسل قميصي
بنهر مابيه دم
اريد اصحه الصبح
الكه الصبح موجود
موالكه الشمس عميه
ونهار اظلم
ياما فتحت بعيوني
دبابات
ياما صبحت
عالخاكي واليس يم
ياما تسللت..
من بين ادين الموت
ياما كلت
هاي المره ما اسلم
ياماصرخه
شكت روحي تالي الليل
افز مرعوب
مدري بصحوه مدري احلم ؟
جابوا صاحبك
جابوا اخوك النوب
جابوا ابن عمك
جدد المأتم
مر حلكي
وأبالع بالصبر عالريج
مزروعه بلهاتي
شجرة العلكم
نفس الثوب الاسود
مانبدل الخام
بس انبدل الاحزان
هم بهم
وتدور السنه
وتدخل على التابوت
واهل الفال
تحسب بالنجم وتعيد
كل عاشور مجبل
نركض انلاكيه
ياعاشور
بشر ماوراك العيد
ما شفته بدرب
من جيت مالاكاك
لايمشي..
ولجحته بعينك من بعيد
ياعاشور
جايمته يجينه
العيد؟
جايمته يجينه الـ ؟
ويروح الصدى يبجي
ويبجي الغيم
ويطيح المطر خايف
مع ينشاف
وتظل المناير
صافنه اعله الناس
مخنوكه بحزنها
مكابله السياف
ينكص راسهه
لو كبرت الله
ويتدحرج الراس
ويحضن الآلاف
مهجوره الجوامع
والصلاه سجين
تكتل
ما يصاحبها كلب خواف .
تموت الناس
عالظن والشهود الزور
والتقرير حاكم
والتهم أصناف
عله السبحه
وعله اللحيه الشباب اتروح
وعلى زيارة إمام
وبعد ما تنشاف
عله كلشي اليغثهم
تنتهي وتضيع
لاتلبس باصبع
يمنتك خاتم
لاتلبس سواد
وتطبخ بعاشور
من اسم الحسين
الدولة تتشاءم
أيا هذا الشعب
محكوم بالإعدام
أيا هذا الشعب
من ظالم لظالم
أكثر شعب يقره الفاتحة
وما زال
يلبس ثوب اسود
دون هلعالم
أكثر شعب
طالت صحبته ويه الموت
سوالفهم طويله
وليل ومنادم
شعبنه يا شعبنه
العبر حزن الناس
وبلون الرماد
انخبط وتلايم
عدنه المكبره
صارت حديقة بيت
وانكسرت الوحشه
وأمن ابنادم
تلكاها الصبح
كلها ترشرش ماي
نسكيها مكابرنه
سكي الاشجار
فلاحين موت
انباري بالبستان
نزرع جثث حلوه
وننتظر الاثمار
طك وادي السلام
وعبر ذاك الصوب
مزدحمه الجديده
يا علي الكرار
ضاكت وين ندفنها
يداحي الباب ؟
كلها تريد يمك
والمكان إحتار
يحفر والعظام
بكل شبر بالكاع
كبر ابنص كبر
ظل يدفن الحفار
جاحته المكابر
تختنك بالناس؟
والماعنده حظ
يندفن بالإيجار
ومن يوم القيامه
الجثث كلهه اتكوم
ياهو اليلكه روحه
وبالعجل يحزب ؟
ياهو يلملم اعظامه
ويصير أنسان؟
ياهو الكبل ربعه
يا على يندب ؟
وآنه من يا كبر؟ من يا أرض بالكون ؟
تجي عظامي غريبه من سفر متعب.
طويت شراعي
لاشرك ولا غرب
كتلت الشوك
وادفنته برماد الروح
وكتبت اعله الكبر
مسكين جان ايحب
تحياتي
لا تنسى الردود على الموضوع فصاحب الموضوع تعب عليه
احدث المواضيع:
رد مع اقتباس
عضـــ عتيــك ــــو
ضوابط المشاركة