انثرلي الشعر خليني اضيع اوياك
واحضني حضنت الشوگ واللهفه
وغنيلي على مايك والجمال البيك
واحچيلي اشتضم ابروحك الترفة
اذا زفة عرس بالعمر مره اصير
انا كلما اشوفك اطلع ابزفة
بشفافك لحن تصفن عليه الاوتار
مو ياهو اليجي عل عود ويعزفة
وبعينك بحر غرگ سفن شمات
واذا ترمش برج ايفل تجي رجفة
اذا تلزم ادية انذوب اني وياك
چن ايدينه شفه وتهمس الشفه
واذا تنجرح مره الجرح بيه ايصير
واگلك اني جرحك وگفت نزفه
مشكلتي احبك مرتبط وياك
مثل عثگ التمر متغطي بالسعفه
طولك نهر دجلة اعله الفرات ايريد
يتمشة ابدلع متكاسر بخفه
وتخافك الناس اشلون تحچي وياك
لان اصلك شريف وعفتك عفه
يا بيت اليلمني من الزغر لليوم
ناس شگد تجيك اجناس مختلفة
ما سديت بابك لا گلت مليت
ولا چفك اجه للعوز مد چفه
اسمك من اگوله أحروفه تحچي وياي
وتسلم عليه وداخلي آتچتفه
اسمك أبجديه وحير الأوصاف
واليكتبك لازم يمتلك حرفه
اذا يكتب عراق ايسمي بسم الله
ويقره الكرسي كلهه اجلال بالوكفه
هذا انت العراق وبيه دوم اتعيش
وغير اسمك هويتي اترفضه وتحذفه
يا اصل الحضارة ومنبع التاريخ
تكوينك الاهي من الذهب اصفه
ودروسك عبر علم اجيال اجيال
حظنك ما عرف اجيال متخلفه
ينخيك بشدايد لليمره العوز
توگفلة صدر لا ما تگف خلفه
سحرك سحر سومر بابل واشور
واذوب بهوى طيفك لو يمر صدفه
يالشايل كلب طيب ومحنه وشوك
مثل ام الابنهه اتعانقه باُلفه
اليفديك عمره وروحه واغلى الناس
لا والله وغلاتك ابد ما وفه
شلت البصرة تاج ومثل للسياب
وكردستان حضنك بالبرد تدفه
بغداد أعله صدرك قبلة العشاق
والي يزور صدرك كل مرض يشفه
ديوان الرمادي بچفك مخليه
والماعرف شخصك خل يجي انحلفه
بينه ارض الحسين وعلي والعباس
كل احنه بوطن شايل جبل چتفه
هيجي إني من احبك يا عراق الخير
والحبك فرض بس بيك يتكفه
احدث المواضيع:
عضـــ عتيــك ــــو
ضوابط المشاركة
رد مع اقتباس